Куыстдæттыны армукъаты нымæц афæдзæй афæдзмæ фылдæр кæны. Уыимæ кæм арæзт æрцæуынц армукъатæ, уыцы бынæттæ дæр къаддæр нæ кæнынц. Радон хатт та адæмæн куыстдæттыны республикон комитет Æрæфы районы сарæзта армукъа. Бæлвырддæр та – Цыколайы. Архайджытæн фадат уыд равзарын алыхуызон дæсныйæдтæ. Уæ зæрдыл ма уын æрлæууын кæндзыстæм, ахæм хуызы армукъатæ конд цæуынц нæ республикæйы сæргълæууæг Битарты Вячеславы хъæппæрисæй.
Куыстагурджытæ бирæ! Ахæм хъуыды иу æмæ дыууæ хатты нæй фехъусæн адæмæй. Уыимæ æрмæст нæ республикæйы районты æмæ дæрддзæф хъæуты нæ, фæлæ ма нæ горæты дæр. Ацы ахсджиаг хъуыддаг æмбаргæйæ ныр цалдæр азы дæргъы нæ республикæйы хицауад Цæгат Ирыстоны районты аразы армукъатæ. Уым алкæмæндæр йæ бон равзарын у цавæрдæр дæсныйад æмæ ацæуын сæрмагонд ахуыртæ. Ахæм фадат абон фæци Цыколайы бынæттон цæрджытæн дæр.
Æрæфы районы куыстдæттыны комитеты фæрцы ныр дыккаг хатт арæзт æрцыд радон армукъа. Районы культурæйы хæдзары æрбамбырд сты куыстуæтты разамонджытæ. Уæгъд бынæттæ бирæ, зæгъынц уыдон. Фæлæ цæмæдæр гæсгæ адæм не ‘рбацыдсты. Цалдæр сахатмæ дзы уыди æрмæстддæр цалдæр адæймаджы. Фæлæ уæддæр Цыколайы цæрджытæн ацы армукъа у бæрæгбоны хуызæн. Саив æй кодтой цыбыр концертон программæйæ.
Цæллагты Мурат, РЦИ-Аланийы Куыстдæттыны комитеты сæргълæууæджы хæдивæг: «Ацы армукъатæ тынг пайда сты адæмæн. Фыццаджыдæр куыст чи агуыр, уыдонæн. Уæдæ куыстуæтты разамонджытæ дæр хъуамæ æмбарой, цавæр ахадындзинад ис ацы армукъатæн, уый. Зæгъæм, мæнæ Цыколайы абон адæмæн сæ бон уыдис равзарын бирæ алыхуызон куысты бынæттæй иу зæрдæмæдзæугæ».
Æмæ, æцæгдæр, куысты бынæттæ бирæ. Уыдоны ‘хсæн: хуыйджытæ, хæринаггæнджытæ, дохтыртæ, бухгалтертæ, ахуыргæнджытæ, инженертæ, методисттæ æмæ ма бирæ æндæр дæснытæ. Уыцы куысты бынæттæ сты æрмæст Æрæфы районы нæ, фæлæ ма Дзæуджыхъæуы дæр. Хъæуы сæргълæууæджы ныхæстæм гæсгæ, ныртæккæ Цыколайы куысты уавæр зæрдæхсаинаг у.
Æрæфы районы æмæ хъæуы администарцийы кусджыты ныхæстæм гæсгæ, фидæны дæр арæзт цæудзысты ахæм армукъатæ. Уыимæ ма сæ уырны, адæм арæхдæр кæй цæудзысты ахæм бынæттæм, уый.
Къутæрты Аидæ
