Джыгкайты Аминӕ лагерь “MEDIA CAMP”-мӕ ныр ӕртыккаг хатт ӕрбацыд. Ам ахуыр кӕнгӕйӕ бирӕ ногдзинӕдтӕ базыдта. Чызг уарзы чингуытӕ кӕсын ӕмӕ йӕхӕдӕг сывӕллӕттӕн аргъӕуттӕ фыссы. Ныридӕгӕн зоны интервью исын ӕмӕ ма суанг телеуынынады дӕр архайдта комкоммӕ эфиры. Аминæйы курдиат бафиппайдта йӕ мад ӕмӕ йӕ ӕрбакодта журналистикӕмӕ.
— Программӕ Paint 3d-йы аразӕм алыхуызон нывтӕ ӕмӕ сӕ ӕрвитӕм конкурстӕм. Ӕз ныридæрæг уыдтӕн Мӕскуыйы æмӕ Волгограды, ӕрӕджы та ацыдыстӕм Дагестанмӕ.
Æвзонг журналистты Лагерь”Звездочка” ныр ӕхсӕзӕм хатт æрымбырд кодта. Уыцы рӕстӕгмæ программӕйы сæхи бафæлвæрдтой 200 скъоладзауы бӕрц. Ам алы архайӕгӕн дӕр йӕ бон у фидӕны дӕсныйад равзарын, ӕмбӕлттӕ ссарын ӕмӕ йӕ гæнæнтæ фæуæрæх кӕнын.— Профилон сменӕ “MEDIA CAMP” у скъоладзаутӕн фадат медиа дунеимӕ базонгӕ уӕвынӕн. Ам базондзысты нымæцон ахуырадон фӕрӕзты тыххӕй. Лагеры ма сывӕллӕттӕн сӕ бон у равдисын ӕмӕ райрӕзын кӕнын сӕ ныхасы арӕхстдзинӕдтӕ.
Сывӕллӕтты ахуыр кӕнынц алыхуызон тексттӕ фыссыныл: цыбыр цаутæй стыр уацты онг. Зындгонд журналисттӕ ӕмӕ сын блогертӕ алы бон дӕр аразынц ахуырадон хъӕзтытӕ. Уыдоны рæстæг скъоладзаутӕ ахуыр кӕнынц интервью исын ӕмӕ цымыдисаг ӕрмӕджытӕ фыссын. Лагеры сӕйраг бынат ахсы практикӕ. Архайджытӕ сӕхӕдӕг агурынц цымыдисаг темӕтӕ, исынц видеотӕ ӕмӕ фыссынц тексттӕ. Лагерь “MEDIA CAMP”-ы фыццаг фæлтæры чи уыд, уыцы 2 лӕппуйы ныридӕгӕн кусынц журналисттӕй. Систы газеттӕ “Чемпион Ир” æмӕ “Слово”-йы уацхӕсджытӕ.
Ӕрыгон журналисттӕ сӕхи фӕлварынц алы здæхтыты: кусынц куыд уацхӕсджытӕ, къамисджытӕ, редактортӕ ӕмӕ телеоператортӕ. Ам сӕйраг миниуӕг у ирон ӕвзаг. Æмæ зӕлы алы ран дӕр: ахуырты æмæ хъӕзтыты рӕстӕг дæр.
Республикӕйы Мыхуыры ӕмӕ дзыллон коммуникациты хъуыддӕгты комитет ӕмӕ сывӕллӕтты журнал “Ногдзау” иумӕ сарӕзтой ацы проект. Куыд зӕгъынц, афтӕмӕй абон лагерь “MEDIA CAMP”-ы архайджытæн сæ бон у сӕйраг редактортимæ комкоммæ ныхас кӕнын. Чи зоны, сæрмагондæй ацы фæлтæры дæр хъомыл кӕны фидӕны зындгонд журналисттæ.
