«Лидеры России», зæгъгæ, æркасты бацархайынмæ курдиат бадæттæн ис 14-æм маймæ. Архайджытæн дзы фадат уыдзæн сæ профессионалон дæсныйадæн аргъ скæнынæн, дарддæр сæ куысты рæзтæн хицæн пълан саразын æмæ стыр компаниты хицæуттимæ базонгæ уæвынæн.
Конкурсы сæ тыхтæ бавзарын сæ бон у Уæрæсейæгтæ æмæ æндæрбæстæгтæй 55 азы онг кæуыл цæуы æмæ 2 азæй фылдæр разамынддæттæг фæлтæрддзинад кæмæ ис, ахæм адæмæн. Ацы аз æркаст у юбилейон. Уымæ гæсгæ алы курдиат бадæттæгæн дæр, æнæмæнг, раттдзысты, йæ куысты йын æххуыс цы фæуыдзæн, ахæм практикон амынддзинæдтæ. Архайджытæн хорз фадат у базонынæн, сæ бон къордты кусын куыд у, стæй разамындæттæджы миниуджытæ сфæлхат кæнынæн. Республикæйы сæргълæууæг Сергей Меняйлойы ныхæстæм гæсгæ, сæ профессионализмыл уый хуыздæрырдæм сахаддзæн.
Æркасты сæйрагдæр лæвæрттæй иу у ахуыр кæнынæн 1 милуан сомы грант. Уымæй уæлдай ма йын гæнæн уыдзæн Уæрæсейаг разамынддæттæгтимæ фембæлын. Уыдон сын зондамонджыты хуызы дæтдзысты профессионалон консультацитæ. Æркаст арæзт цæуы Владимир Путины уынаффæмæ гæсгæ 2017-æм азæй. Уæдæй нырмæ 400 архайæгæй фылдæр снысан кодтой уæлдæр кусæн бынæттæм.
