Людмила Башарина сси республикæйы ахуырад æмæ наукæйы министры хæдивæг, уыимæ æххæст кæндзæн министры хæстæ дæр. Уый тыххæй фехъусын кодтой хицауады радон æмбырды. Министр чи уыдзæн, уый бæрæг нæма у.
Фæллой æмæ социалон рæзты министры фыццаг хæдивæг сси Маматы Анжелæ, йæ иннæ хæдивæгæй та йын снысан кодтой Гæджиты Экæйы.
Æмбырды æрдзырдтой республикæимæ баст 60 ахсджиаг фарстайыл. Ныхас кодтой ахуырады райрæзт æмæ лæвар медицинон лæггæдты тыххæй. Территориалон программæмæ гæсгæ лæвар медицинон æххуыс райсынæн радих кæндзысты 10 миллиард сомы. Уый тыххæй фехъусын кодта æнæниздзинад хъахъхъæныны министр Годжыцаты Тамерлан. Йæ ныхæстæм гæсгæ, уыцы бæрц фаронимæ абаргæйæ у фылдæр.
Людмила Башаринæйы фехъусын кодта, национ проект «Демографи»-йы фæлгæты æртæ азмæ нæ республикæйæн лæвæрд æрцæудзæн 1 млрд. 446 млн сомы. Æхцатæй сывæллæтты рæвдауæндæтты сараздзысты уæлæмхасæн бынæттæ. Национ проект «Образование»-æн та федералон бюджетæй радих кæндзысты 4 милуаны æмæ 40 мин сомы. Уыдонæй йе `нæниздзинад хъыгдард кæмæн у, уыцы сывæллæттæн сараздзысты ахуыр кæнынæн æмбæлгæ уавæртæ.
Æмбырды куыд загътой, афтæмæй республикæйы бирæфатерон хæдзæртты бындурон цалцæджы программæ кусы 2014-æм азæй 2038-æм азмæ. Проектмæ бахаудысты 2530 бирæфатерон хæдзары. Цæры дзы республикæйы цæрджыты 35%. Хицауады сæрдар куыд фæнысан кодта, афтæмæй ацы программæйы куыстмæ хъæуы уæлдай цæстдард здахын. Бæрнон кусджытæ æрныхас кодтой хъæууон хæдзарады фарстатæ æмæ амалхъом адæм, стæй фермертæн æххуыс кæныны мадзæлттыл.
