18-аздзыд Бутаты Таймуразы арвыстой Мæскуымæ йæхи дзæбæх кæнынмæ. Æрыгон лæппумæ разынд уæззау низ. Йæ мад Бутаты Наталья бахатыд республикæйы сæргълæууæг Битарты Вячеславмæ, цæмæй йын йæ фыртæн баххуыс кæна, Фыййагдоны Алагиры районы цæрджытимæ фембæлды рæстæг.
Сылгоймаг радзырдта республикæйы сæргълæууæгæн, Таймуразы уавæр бонæй-бонмæ æвзæрдæр кæй кæны. Хъæуы йын бæстон медицинон иртæстытæ саразын. Битарты Вячеслав бабар кодта республикæйы æнæниздзинадхъахъхъæныны министр Годжыцаты Тамерланæн æппæт хъæугæ мадзæлттæ саразын æмæ æрыгон лæппуйы профилон медицинон уагдонмæ арвитын. Дыууæ боны фæстæ Таймураз йæ мадимæ атахтысты Мæскуымæ.
Цæгат Ирыстоны æнæниздзинадхъахъхъæныны министр Годжыцаты Тамерланы ныхæстæм гæсгæ, Уæрæсейы сæйраг онколог Андрей Каприны уынаффæмæ гæсгæ, Бутаты Таймуразы æрхуыссын кодтой Герцены номыл Мæскуыйы наукон иртæстыты онкологон институты.
