Мæскуйы скъоладзауты базонгæ кодтой Цæгат Ирыстоны культурæ æмæ традицитимæ

8.10.2019 16:16

Уæрæсейы паддзахадон сывæллæтты чиныгдоны «Здравствуй, сосед», зæгъгæ, рухстауæн проекты фæлгæты ацыд республикæйы бон.

Мæскуйы скъоладзауты базонгæ кодтой Цæгат Ирыстоны культурæ æмæ традицитимæ. Уæрæсейы паддзахадон сывæллæтты чиныгдоны «Здравствуй, сосед», зæгъгæ, рухстауæн проекты фæлгæты ацыд республикæйы бон. Мадзалы райдиан Цæгат Ирыстоны фæсивæды минæварады сæрдар Фæрниаты Сослан æмбырды архайджытæн арфæ ракодта республикæйы разамынды номæй. Загъта сын бузныг Ирыстоныл иузæрдион кæй сты. Чысыл уазджытæн бацæттæ кодтой цымыдис культурон-зонадон программæ. Дзæуджыхъæуы историйы тыххæй сын равдыстой киноныв. Литературон хаймæ Мæскуыйы уæлдæр ахуыргæнæндæтты студенттæ бацæттæ кодтой презентаци. Сывæллæтты базонгæ кодтой адæмон аргъæуттæ æмæ Нарты Кадджыты скъуыддзæгтимæ. Концертон программæ адæмы рæгъмæ рахаста адæмон кæфтыты ансамбль «Æрхон». Уымæй уæлдай ма фæсивæдæн сарæзтой дæсныйад æвдисæг ахуыртæ, сахуыстой ирон чъиритæй. Чиныгдонæн ма балæвар кодтой Хетæгкаты Къостайы æмдзæвгæты æмбырдгонд «Ирон фæндыр» æмæ сывæллæттæн æмдзæвгæты чиныг «Иры сабитæн», зæгъгæ. Уæ зæрдыл уын æрлæууын кæндзыстæм мадзал сарæзтой сывæллæтты чиныгдон æмæ Президенты цур Цæгат Ирыстоны фæсивæдон минæварады хъæппæрисæй.

Предыдущий материал

Æппæтуæрæсеон адæмон фронты уæнгтæм сæ курдиатимæ фæсидтысты Беслæны цæрджытæ

Следующий материал

Газель фæндаггон фыдбылызы кæй бахауд, уый аххосæй хъыгдæрд баййæфтой дыууæ адæймаджы