Магкæты Зурабы номыл уынджы цæрджытæ разы не сты, сæ хæдзæртты раз цы сагъд бæлæстæ ис, уыдон кæй калынц, уымæй. Ам цæуынц сæрмагонд куыстытæ – аразынц дзы ног канализаци. Цæрджытæ ма тыхсынц, ног хæтæлтæ æвæргæйæ дондзæуæн системæ куы бахъыгдарой, ууыл.
Магкæты Зурабы номыл уынджы æмвæрсыты цы бӕлӕстӕ зайы, уыдоны фидыц ссис мæнæ ацы дзыхъхъ. Къахын æй райдыдтой къуыри раздӕр. Бынæттон цæрджытæ ацы хъуыддагимæ разы не сты.
Йæ аххосаг та уый мидæг ис, æмæ бæлæстæ зайынц сосæ фæндаджы былгæрон. Бæлæстӕн сӕ фылдӕрыл ам дæс азы бӕрц цӕуы. Уæвгæ сæ цæрджытæ сæхæдæг сагътой. Уæдæ сæм зилгæ дæр сæхи хъарутæй кодтой. Кæм-иу кæрдæг ракарстой, кæм та-иу бырæттæ æрæмбырд кодтой. Раст зæгъгæйæ, ацы бæлæстæ цæрджыты рыг, чъизи æмæ машинæты фæдзæгæй тынг хъахъхъæнынц. Цӕрджытӕ сӕ хъаст алыхуызон бæрнадтæм дæр хастой, фæндыд сæ базонын, цавæр куыстытæ дзы цæуынц.
Сæ ракомкоммæ бирæуæладзыгон хæдзæрттæ 5 азы размæ сарæзтой. Куы сæ амадтой, уæд сæ баиу кодтой зæронд коллекторимæ. Цæрджыты ныхæстæм гæсгæ, рæстæгмæ. Фæлæ ныр та тæрсынц, цы ног хæтæлтæ æвæрынц, уыдон канализацийы куыст куы фæкъуылмпы кæной, уымæй.
Комуналлон лæггæдты куыстуаты сын зæрдæ æвæрынц, тæссаг дзы кæй ницæмæй у, уымæй.
Фæлæ уæддæр, коллектор ногыл баивын у æнæмæнг хъуыддаг. Уæвгæ, ацы проект хаст æрцыд «Владсток»-ы инвестицион программæмæ. Ацы рацарæзтмæ ам 10 азы дæргъы бæллыдысты. Куыстыты фæлгæты сног кæндзысты 600 метрæй фылдæр хæтæлтæ. Проектыл чи бакуыста, уыдон техникон бæрæггæнæнтæ хынцынц. Фидæны коммуникацитæ иуылдæр, гæнæн ис, æмæ раивой.
