Мамысоны курорты ацы аз райдайдзысты дондзæуæн æмæ электрон тыхы системæты нывыл кæныны куыстытæ. Æрвылазон туристон комплексы аразынц дæлстанцæ. Электрон тыхæй ифтонг кæндзæн инфраструктурон объекттæ.
Цавæр куыстытæ ма конд æрцæудзæн, ууыл æрдзырдтой сæрмагонд æмбырды. Архайдтой дзы хицауады сæрдары хæдивæг Фадзайты Æхсарбег, стæй цæрæнуæтты-коммуналон хæдзарад, артаг æмæ энергетикæйы министр Тамайты Майран.
Æмбырды уынаффæ рахастой «Мамысон»-ы дæлстанцæйы уавæрмæ бæстонæй æркæсын. Нуазыны дон дæр Мамысонмæ хъуамæ ауадзой ацы аз. Уымæй уæлдай æмбырды æрныхас кодтой Алагиры донсыгъдæггæнæнтæ æмæ Мæздæджы æртæ донцъирæны арæзтады пъланыл.
