Михайловскийы байгом ног культурæйы хæдзар

Йæ дуæрттæ йын кадджынæй байгом кодта нæ республикæйы сæргълæууæг Битарты Вячеслав. Куыд радзырдта, афтæмæй федералон программæмæ гæсгæ нæ республикæйы кæй байгом кодтой, ацы объект иунæг ахæм нæу.
Бæстыхайы цур æрæмбырд сты хъæуы цæрджытæ. Уыдон уыцы хъуыддагмæ рагæй æнхъæлмæ кастысты. Михайловскийы культурæйы хæдзар никуы уыди. Сырх лент алыг кодтой сывæллæттæ. Зæрдылдарæн цау фенын бафæндыди се `ппæты дæр, бæстыхайы цæугæ дæр нæ кодтой. Зал у стыр, сфæлдыстадон къордтæ кæм кусдзысты, уыдон дæр – райдзаст æмæ уæрæх. Абон дзы уыцы-иу рæстæг уыди кадджын æмбырд – Битарты Вячеслав районы хуыздæр кусджытæн радта кады гæххæттытæ æмæ бузныджы фыстæджытæ. Сæ аккаг систы дохтыртæ, ахуыргæнджытæ æмæ культурæйы кусджытæ. Ног бæстыхаймæ канд фæсивæд нæ цæудзæн, фæлæ дзы сæ рæстæг æрвитынæн фадат уыдзæн хъæуы æппæт цæрджытæн дæр.