Фæткмæ гæсгæ уалдзæджы кæрон Ирон театры артисттæ сæ аивадуарзджытæн зæгъынц «Нæ ног фембæлдмæ». Театрдзаутæ æрынкъард вæййынц. Фæлæ уæлдай тынгдæр фенхъæлмæ кæсынц фæззæгмæ. Ног прьемерæтæм æмæ ног фембæлдтытæм, артистты ног сурæттæм. 83-æм радон театралон сезон æхгæд æрцыд.
Ирон театрыл æнувыд чи у æмæ йæ хæдзар кæмæн сси, уыцы актертæн уæлдай ахсджиаг вæййы театралон сезон сæхгæныны рæстæг. Сæ арæхстдзинад æмæ фæлтæрддзинад куыд равдыстой, уый сбæрæг кæнын адæмы бæрны вæййы . Ам та иу хатдзæг йеддæмæ скæнæн нæй. Сезоны дæргъы ирон театры спектакльтæм бакæсынмæ адæм æмгуыппæй цыдысты. Залы иу уæгъд бынат нæ уыд. Уыцы иу спектакльмæ бакæсынмæ адæм цыдысты цалдæр хатты? Арæх иу билеттæ дæр зынтæй ссарæн уыд. Уæвгæ, ацы сезоны ирон театры артисттæ цæмæй раппæлой, уый ис. Фыццаджыдæр, ног премьерæтæй. Адæм сæ сæ зæрдæтæм тынг айстой.
Æлбегаты Алан, РЦИ-Аланийы адæмон артист: «Зæлийы чындзытæм» театрдзаутæ рагæй æнхъæлмæ кастысты. Ацы спектакль 20 азæй фылдæр сценæйыл æвæвæрд нæ уыд. Ныр дзы ног цард бауагътой. Пъесæ ныффыста адæмæн уарзон æмæ зынгонд актер Саламты Къола. Спектакль схонæн ис царды энциклопеди. Ирдæй дзы æвдыст цæуынц бинонты `хсæн ахастдзинæдтæ, бинойнæгты æнкъарæнтæ, æгъдæуттæ, цардыуаг, адæмы миддуне. Æфсин Зæли куыд зæгъы, афтæмæй спектакль кæддæриддæр актуалон у. Фæсивæды та йæм, æнæмæнг, бакæсын хъæуы. Бирæ зонд дзы рахæсдзысты».
Ирон театрыл æнувыд чи у, цалынмæ иу ахæм адæймаг уа, уæдмæ театр дæр цæрдзæн. Ахæм цард та никуы аскъуындзæн. Уымæн æвдисæн – театралон аивадмæ адæмы уарзондзинад. Цыфæнды дуджы æмæ зын рæстæг дæр театрæн рæстæг ссарынц.
Театралон сезон сæхгæныны кадджын мадзалы алкæддæр вæййы актертæ кæй нæ фæзонынц, ахæм æхсызгон сусæгдзинæдтæ. Ныр дæр республикæйы сæргълæууæджы уынаффæмæ гæсгæ театралон аивадмæ стыр æвæрæн чи бахаста, уыдоны схорзæхджын кодтой алыхуызон хæрзиуджытæй. Рæмонты Ритæйæн радтой Цæгат Ирыстоны адæмон артисты ном. Тыбылты Анжеликæ нырæй фæстæмæ хæсдзæн Цæгат Ирыстоны сгуыхт артисты ном. Скъодтаты Иринæйы та нæ республикæйы сæргълæууæг схорзæхджын кодта кады грамотæйæ. Раппæлинаг ма у уый дæр æмæ ирон театры актертæ гастрольтæм арæхдæр цæуын райдыдтой. Ныртæккæ труппæ ис Бакуйы. Уым архайдзысты дунеон фестивалы æмæ дзы хъахъхъæндзысты Уæрæсейы ном.
