Адæмон æмæ национ спорты хуызтæ фæсивæды ‘хсæн парахат кæнын, æрыгæтты физкультурæ æмæ спортмæ æмхиц кæнын. Ахæмтæ уыдысты «нæртон хъæзтыты» спортивон фестивалы сæйраг хæстæ. Республикæйы алы районты мынæвæрттæ сæ тыхтæ æвзæрстой нæ рагфыдæлты хуызæн.
Æртæ чъирийы, æртæ фæрсчы æмæ ирон бæгæны. Горæтгæроны районы Тедеты Елхъаны номыл стадионы ерыстæ райдыдтой, куыд æмбæлы афтæ – хистæры скуывд æмæ фæдзæхстæй. Фестиваль «Нæртон хъæзтытæ» у æрвылазон. Йæ аразджытæ – Цæгат Ирыстоны Фæсивæды хъуыддæгты фæдыл комитет, Горæтгæроны районы администрацийы фæсивæды фарстаты, физкультурæ æмæ спорты хайад æмæ районы фæсивæды социализацийы центр. Сæ ныхæстæм гæсгæ, ерыстæ арæзт сты фæсивæды боны агъоммæ æмæ сын ис стыр мидис.
Ерысты бацархайыны фадат уыд, 18 азæй фылдæр кæуыл цæуы, уыцы æрыгæттæн. Архайджытæ æрбацыдысты нæ республикæйы алы районтæй дæр.
Уæлахиздзаутæн Фæсивæды хъуыддæгты фæдыл комитет бацæттæ кодта кубоктæ, майдантæ æмæ кады гæххæттытæ. Æмбулгæ та ракодта хæлардзинад. Уæдæ кæстæртæ дæр спортмæ æмхиц кæй кæнынц, уымæн дæр къаддæр нысаниуæг нæй.
Уæзæгтæ исын æмæ хæссын, цалхы цъæрттæ фæлдахын, фатæй æхсын, стыр дур дардмæ æппарын, бæндæн ивазын, уæхскæй къуырын æмæ къæбæлæй исын. Ацы æмæ æндæр нæртон хъæзтытæй абон сæхи фæлвæрдтой нæ республикæйы сагсур фæсивæд.
