Нартыхъæуы скъолайы ахуырдзаутæ йæ хорз зонынц халсартæ æмæ дыргътæ куыд æрзайын кæнын хъæуы, уый. Æппæт лыстæгдзинæдтæ сын амонынц сæ ахуыргæнджытæ. Ныртæккæ æвзонг зæхкусджытæ куынæг кæнынц хæмрæлгæрдæг. Уый тыххæй хуымты ‘хсæн тауынц карст кæрдæг. Сæхæдæг сæвæрдтой донпырх кæнæн системæ дæр. Фæсивæд быдырты цæуынц практикæ, ацы сæрд ныссагътой хъæууонхæдзарадон 15 культурæйы.
Нас, картоф, пъæмидор, цывзы, баклажан, нартхор, басгæрдæг, цæхæра æмæ æндæртæ. Чызджытæ æмæ лæппутæ мыггæгтæ сæхæдæг ныссагътой. Талаты уавæрмæ кæсынц æппынæдзух, хуымты фæллой кæнынц сæ тыхтыл æмæ рæстæгыл нæ ауæрдгæйæ. Аграрон къласы ахуырдзаутæ сæ цард цы къабазимæ сбæтдзысты, уый рагацау зонынц. Сæ фылдæр ныридæгæн равзæрстой уæлдæр ахуыргæнæндон æмæ факультет.
Зайæгойтæм зилын æнцон нæу. Фæсивæды зонгæ кодтой куысты сусæгдзинæдтимæ. Сæхи цæттæ кодтой афæдзы дæргъы. Ахуыртæ цыдысты Хæххон паддзахадон аграрон университеты. Аграрон кълæстæ сты дыууæ министрады иумæйаг проект — ахуырады æмæ хъæууон хæдзарады. Педагогтæ йæ фидарæй зонынц, ахæм гæнæнты фæрцы фæсивæд æнцонæй æвзардзысты фидæны дæсныйад.
Æмткæй ивгъуыд азæй национ проект “Фæсивæд æмæ сывæллæттæ”-мæ гæсгæ Цæгат Ирыстоны байгом кодтой 11 профилон агрокъласы. Æмæ специалисттæ куыд зæгъынц, афтæмæй ахуырдзаутæ æвдисынц хорз бæрæггæнæнтæ. Сывæллæттæн сæ каникултæ ацæуынц хъæлдзæгæй æмæ пайдаимæ. Ныр та æхсызгонæй æнхъæлмæ кæсынц фыццаг тыллæгмæ.
