Объектæн раивтой йæ сæр, бауагътой электрон тыхдæттæг системæ, мидаггаг куыстытæ сты сæ тæмæны. Кабинетты уыдзæн линолеум, ауайæнты та бырынцъаджы ныхмæ плиткæ. Специалисттæ ныридæгæн архайынц объекты æддаг бакастыл. Райдыдтой йæ ахорын. Футболон фæз дæр йæ хуыз скалдзæн. Кæрдæджы бын мæр дæр сæмраст кодтой. Спортивон зал сцалцæг кодтой дыууæ азы размæ. Объекты æрвылбон кусынц 50 адæймаджы. Уæлдай æргом, кæй зæгъын æй хъæуы, здахынц æдасдзинадмæ.
Скъолайы ахуыр кæны 100 адæймагæй фылдæр. Се ‘хсæн хæстæг хъæуты сывæллæттæ дæр. Скъола куы байгом уа, уæд ахуырдзаутæн сæ бон уыдзæн фæсурокты сæ зонындзинæдтæ фидардæр кæнын, цæуын алыхуызон сфæлдыстадон къордтæм. Уымæй уæлдай ма, ам байгом кæндзысты “Рæзты тæлм” цалдæр здæхтмæ гæсгæ. Ног нымæцон æмæ технологон ифтонггæрзтæ самал кодтой. Скъолайы фарсмæ бæстыхай та у рæвдауæндон. Уымæ дæр базылдысты, сцагътой ын йæ къултæ, сывæрдтой дзы ламинат. Ныридæгæн цæттæ кæнынц сантехникæ æмæ хъармгæнæнтæ. Ахуыргæнæндоны æддаг бакаст дæр саив кодтой. Бахизæны сывæллæттæ сæ рæстæг кæм æрвитдзысты, ахæм бынæттæ.
Куыстыты æппæт гуырахст у 1400 квадратон метрмæ ‘ввахс. Бындурон цалцæг цæуы паддзахадон программæ æмæ национ проект “Ахуырад”-мæ гæсгæ.
