Ацы бинонтæн æнкъард никуы вæййы. Сæ кæстæр Полинæ йæхи фæлвары балеты, театралон студийы, музыкалон скъолайы. Чызджы ныридæгæн бахастой Уæрæсейы курдиатджын сывæллæтты номхыгъдмæ. Хистæр Аннæ цæгъды кларнетыл, фортепианойыл архайы Цæгат Ирыстоны иугонд командæйы ленк кæнынæй. Сæ Мад Иринæ инженер у, цæттæ кæны æфсæддон техникæйы хæйттæ. Хæдзары чингуытæ кæсын та сæ иумæйаг архайд у.
Елена Ракитинайы аргъау “Ног азы хъазæнты цаутæ”. Дзырд дзы цæуы сабибонты мысинæгтыл, бæрæгбоны æхсæв диссæгтæ кæй æрцæуы, уый уырнындзинадыл. Цалынмæ мад æмæ чызг сценæйыл сæ арæхстдзинад æвдисынц, уæдмæ залæй видеомæ исы сывæллæтты фыд. Бинонтæ куыд зæгъынц, афтæмæй уый хæдзары раззагдæр чиныг кæсæг у. Уымæ гæсгæ бинонтæ Вахтанговы хæдзармæ æнæмæнг хъуамæ æрбацыдаиккой.
Ног азы бинонты кæстытæ ацыдысты æгас Уæрæсейы. Ахæм хъуыддаг никуы ма уыд. Сывæллæттæ хистæртимæ æвзæрстой уарзон уацмыстæ, сценæйыл радзурынмæ. Уыимæ ма сæ æнæмæнг хъуыд декорацитæ бацæттæ кæнын. Сæ равдыстытæ цæмæй барæсугъд кодтаиккой, уый архайджытæ сæхæдæг æвзæрстой. Зæгъæм, бирæтæ сæ фынгтыл æрæвæрдтой ирон чъиритæ.
Ног аз литературæйæ фæхæстæгдæр кодтой 17 цæгатирыстойнаг бинонтæ республикæйы алы районтæй. Уый муниципалон къæпхæн æнтыстджынæй чи ацыд, уыдон. Раст зæгъгæйæ, бацархайын кæй фæндыд, уыдон дыууæ хатты фылдæр уыдысты.
Литературæ сбаста Уæрæсейы 10 горæты. Мæскуы, Петербург, Екатеринбург, Челябинск, Стыр Новгород, Казань, Ярославль, Тулæ, Самарæ, æмæ, æнæмæнг, Дзæуджыхъæу. Ацы горæтты кæсын бирæ уарзынц. Æгас бæстæйы та сты цыппар сæдæ бинонтæй фылдæр.
Сабийæн литературæ бауарзын кæнæн ис хи дæнцæгæй. Мæнæ афтæ иумæйагæй бæрæгбоны уарзондæр уацмыстæ кæсгæйæ. Ног азы кæстытæ сарæзта фонд “Живая классика” Культурон хъæппæристы президентон фонды æххуысæй. Афтæ аивæй кæронбæттæн скæндзысты бинонты афæдзæн, иу хатт ма йæ равдисдзысты бинонты иумæйаг рæстæгæрвыстæй ахджиагдæр кæй ницы ис, уый.
