Нырыккон нымæцон технологиты руаджы фæндæгтыл фæкъаддæр уыдзæн фæндаггон фыдбылызты нымæц. Уый тыххæй ныхас кодтой хицауады сæрмагонд æмбырды. Разамынд ын лæвæрдта Тускъаты Таймураз.
Æмбырды архайдтой хицауады сæрдары хæдивæг Фадзайты Æхсарбег æмæ Кæсæбиты Игорь, стæй куыстуат «Глонасс БДД»-ы минæвæрттæ. Тускъаты Таймураз куыд фæнысан кодта, афтæмæй ныртæккæ Цæгат Ирыстоны егъау куыст кæнынц «Æдас æмæ хæрзхъæд фæндæгтæ», зӕгъгӕ, национ проекты фæлгæты.
Республикæйы фӕндӕгтӕ ифтонггонд сты 100 видеоцæстдарæн камерæйӕ. Уыдон нысан кæнынц фæнддагон змæлды фæткхæлдтытæ. Ахсджиаг хъуыддаг кæй у, уый фæбæрæг кодта куыстуат «Глонасс»-ы генералон директор Максим Нечеухин дæр. Йæ ныхæстæм гæсгæ, фарон бæрæггæнæтæ хорз сбӕлвырд сты, æмæ ныр фæнд кæнынц ног проекттыл бакусын Цæгат Ирыстоны. Компанийы æрæджы æрхъуыды кодтой «Фæндæгтыл æдасæй цæуын»-ы аппаратон комплекс.
Уый руаджы фæлхат кæнынц фæндаджы алы уадздзаджы хæрзхъæддзинад дæр, æдасдзинады домæнтæн дзуапп дæттынц æви нæ, уый. Фæндагæн нымæцон хыз саразыны фарс рахæцыд Хицауады сæрдар. Йæ ныхæстæм гæсгæ, уый пайда уыдзæн фæндаджы уавæрмæ фылдæр æргом здахынӕн. Специалисттæ ма радзырдтой, интеллектуалон системæтæ куыд ахадынц фæндаггон змæлдыл, уый тыххæй. Пайда сæ кæнын хъæуы, зӕгЬгӕ, фæнысан кодтой æмбырды. Уый тыххæй та уал æркæсдзысты, ныридæгæн цы регионты сты, уым куыд кусынц, уымæ.
