Нывгæнджыты цæдисы байгом гыкъынаты равдыст

Цымыдисаг аивады хуыз — гыкъынатæ кæнын. Куклатæ аразæг дæсныты бонмæ Дзæуджыхъæуы байгом гыкъынаты 7-æм равдыст “На высоте”. Мадзалы автор у Таутиаты Азæ. Цæгат Ирыстоны зындгонд сты йæ аив гыкъынатæ. Равдысты архайы 45 æрмдæсныйы æгас Цæгат Кавказы республикæтæй, Хуссар Ирыстонæй, Мæскуы æмæ Санкт-Петербургæй. Азæй азмæ тематикæ уæрæхдæр кæны. Фылдæр æргом здахын райдыдтой национ тематикæмæ, Нарты кадджыты хъайтартæм. Сырдон æмæ Сатана, аргъæутты æмæ ктнонывты зындгонд персонажтæ. Равдысты архайынц канд фæлтæрдджын æрмдæснытæ нæ, фæлæ ацы цымыдисаг сфæлдыстады фыццаг къахдзæфтæ чи кæны, ахæм фæсивæд дæр. Куклатæ фенæн уыдзæн Нывгæнджыты цæдисы 29 мартъийы онг.