Чызджытæ къонайы æфсинтæй уæлдай не сты: сæ уæлæ раздарæнтæ æрбабастой, сæрыл — кæлмæрзæн. Сæ разы хыссæйы тымбылтæ æмæ гахæ. Хъуамæ скæной уæлибæхтæ. Арæхстдзинад равдисын кæй хъæуы, уый иу хъуыддаг у, фæлæ ма иннæтæй сæрæндæр хъуамæ разынай, ерыс у рæстæгмæ гæсгæ. Рахизфарсы районы минæвар Джимиты Агуындæ чъиритæ кæнын сахуыр ацы æркастмæ йæхи куы цæттæ кодта, уæд.
Чъиритæ культурæйы галуаны кæрты афыхтой æмæ сæ уайтагъд жюрийы уæнгты раз æрæвæрдтой. Иу уæлибæх иннæмæй дзадджындæр.
Сæхи ирон цæмæн хонынц, уый дæр радзырдтой чызджытæ. Сæ мыггæгты равзæрд æмæ номдзыд фыртты тыххæй, се ‘рвадæлтæ чи сты æмæ ирондзинады дæнцæг кæмæй исынц.
Сфæлдыстадон къæпхæн дæр бирæвæрсыг рауад. Уыд дзы куыд æмдзæвгæтæ æмæ зарджытæ, афтæ ирон кæфтытæ дæр. Кæронбæттæны хъуыди радзурын фыдæлтæ баззайгæ рæсугъд æгъдæуттæй иуы тыххæй. Рыныбардуаг, авдæнбæттæн, Сафайы рæхыс, хызист, Задалески Нана: уæрæх æмæ мидисджын рауад æркасты ацы хай.
Ам, Октябрыхъæуы культурæйы галуаны, ацы æркаст саразынц æрвылаз. Архайджыты кар у 16-æй 22 азы онг. Ацы хатт хуыздæр разынд Æрыдоны районы минæвар Уататы Кристинæ.
Дыккаг бынат райста Горæтгæрон районы минæвар Агънаты Дианæ, Æртыккаг — Хæмыцаты Аринæ Æрæфы районæй. Ерысдзауты ‘хсæн хуыздæрты равзарын æнцон кæй нæ уыд, уый фæнысан кодта жюрийы сæрдар, адæмон сфæлдыстады хæдзары директор Лалыты Хъазыбег.
Мадзал барæсугъд кодтой республикæйы аивадон къордтæ æмæ артисттæ. Раздæр æй районы хъæуты минæвæртты ‘хсæн арæзтой. Йæ арæнтæ фæуæрæх кæнын та йын сфæнд кодтой ацы аз.
