Уыдис, ординатурӕйы ахуырадон бадзырдтӕ бафыссыны аккаг чи у, уыдоны ӕвзарӕг къамисы ӕмбырд. Амыдта йӕ республикӕйы хицауады сӕрдары хӕдивӕг Тугъанты Ларисӕ. Ныхас цыд бадзырдтӕ 2022-2023 азмӕ бафыссыныл. Хицауады сæрдары хæдивæг йæ ныхасы райдиан фæбæрæг кодта, республикæйы разамынд ахуырадимæ баст уынаффæмæ ивддзинæдтæ кæй бахаста. Баст сты, цы бадзырдтыл дзырдтой, уыимæ.
Ногдзинæдтæм гæсгæ, адæймагæн бар ис курдиат æртæ ахуырадон кусæндонмæ бадæттынæн, æрмæст дзы алкæцыйы дæр иу дæсныйад равзаргæйæ. Ахсджиаг у уый, æмæ курдиаты æппæты разæй фæнысан кæнын хъæуы, адæймагæн тынгдæр йæ зæрдæ кæмæ `хсайы, уыцы дæсныйад. Афтæ ма – тынгдæр æй цы ахуыргæнæндонмæ фæнды, уый дæр. Къамисæн бар ис, иумæйаг паддзахадон фæлварæны бæрæггæнæнтæ фаг чи нæ райста, уыдонимæ дæр бадзырд бафыссынæн. Фæлæ æрмæстдæр уæд, æмæ ахуыргæнæндоны уæгъд бынæттæ куы уа.
Дæсныйæдтæ та равзарæн ис экономикæ, ахуырад, æнæниздзинад хъахъхъæныны, социалон лæггæдты, культурæ, æхсæнадон ахастытæ æмæ паддзахадон хицаудзинады къабазы. Тугъанты Ларисæ фæбæлвырд кодта, йæ ныййарджытæ Украинæйы сæрмагонд хæстон операцийы кæмæн архайынц, уыцы сывæллæтты хъысмæт дæр. Куыд загъта, афтæмæй уыдонæн бадзырдтæ бафыссыны бартæ уæлдай хъомысджындæр уыдзысты. Уыцы-иу рæстæг къамисы уæнгтæ æркастысты абитуриентты курдиæттæм æмæ снысан кодтой, æнæниздзинад хъахъхъæныны къабазы чи райсдзæн уæлдæр аххуырад, уыдоны номхыгъд.
Æмбырды кæронбæттæны та йæ архайджытæ баныхас кодтой, культурæимæ чи фæнд кæны йæ дæсныйад сбæттын, уыдоны курдиæттæм æркæсын.
