Патриотизм æмæ Фыдыбæстæмæ уарзондзинад Туаты бинонтæ нымайынц сæйрагдæрыл. Уыцы миниуджытæ сабийæ фæстæмæ амонынц сæ цотæн дæр. Арсений у сæ кæстæр, цæуы йыл 8 азы. Фæлæ ныридæгæн дæр æмбаргæ лæппу у. Уарзы йæ райгуырæн бæстæ, хиуæтты, уазджыты. Уæдæ не сфæлдыстадон къордыл дæр сæмбæлд æхсызгонæй æмæ цингæнгæйæ.
Алы сывæллон дæр сæрæстырæй дарддæр хæццæ кæны йæ ныййарджыты хуыздæр миниуджытæ. Арсений у йæ мады хуызæн – арф æнкъараг. Астæуккаг лæппу Макарий та фылдæр у йæ фыды хуызæн. Фидар удыхъæд æмæ кæддæриддæ баххуыс кæнынмæ цæттæ. Лæппу ис сæрмагонд æфсæддон операцийы ветеранты ассоциацийы, у бархион. Ахуыр кæны электроникæйы колледжы, ис ын йæхи блог программировани æмæ технологиты тыххæй.
Сæ хистæр фырт – Руслан. Цæуы йыл 22 азы, ахуыр кæны Хæххон-металлургон институты. Фæлæ ма уымæй уæлдай кусы хилдасæгæй. Йæ ныййарджыты ныхæстæм гæсгæ, æрвылбон вæййы салоны, уымæ гæсгæ йæ мах дæр хæдзары нæ баййæфтам.
Кæддæриддæр мидбылхудгæ, уазæгуарзон æмæ хæларзæрдæ. Ахæм у бинонты æфсин Верæ. Йе ‘мкъай Русланимæ базонгæ сты нырма æнахъомтæ куы уыдысты, уæд. Рæстæг куыд цыд, афтæ йæ бамбæрстой æнæ кæрæдзи сæ бон кæй нæу, уый. Иумæ бирæ зындзинæдты сæрты ахызтысты, фæлæ сæ бастдзинад сси æрмæст фидардæр.
Конкурсы бацархайыны хъæппæрис дæр разынд Верæмæ. Æрæмбырд кодта хъæугæ документтæ, хуызистытæ æмæ видеоæрмæджытæ. Æдæппæтæй æркасты архайдтой 500 адæймаджы, Туатæ фæуæлахиз сты “Фыдыбæстæ хъахъхъæнæджы бинонтæ” номинацийы. Сылгоймаджы ныхæстæм гæсгæ, сын ацы цау æрхаста бирæ æхсызгон æнкъарæнтæ.
Бинонты хистæр Артур у сæрмагонд æфсæддон операцийы ветеран. Хæстон хъуыддаг нымадта йæ царды нысаныл. Сæрæстырæй хæццæ кодта йæ фыдæлты традицитæ. Тохы быдырмæ нæлгоймаг ацыд барвæндонæй, йæ бинонтæ йæ зонгæ дæр нæ кодтой, афтæмæй. Цæмæй сæ зæрдæ ма ‘хсайа, зæгъгæ.
Бинонтæн уæззаудæр рæстæг уыд Артур уæззау цæф куы фæцис, уæд. Фехъусын сын кодтой ис госпиталы, зæгъгæ. Уыцы цаутæ Верæйæн абон дæр æнæ цæстысыгæй йæ бон дзурын нæу.
Йæ цот æмæ йæ бинойнагæн Артур æрмæст ветеран нæу. Лæгдзинад æмæ æхсардзинады дæнцæг. Хъæбатыр равдыста Фыдыбæстæйы сæраппонд йæ цард раттын дæр кæй не ‘вгъау кæны, уый. Ныридæгæн нæлгоймаг æххуыс кæны сæрмагонд операцийы архайджыты бинонтæн.
