Ахуыр кæнын, спорт æмæ æрмдæсныйадæй архайын. Ацы куыстытæ бирæтæн сты хуымæтæг. Уæд Полина Тишковæйæн та нæ. Ног протез чызгæн сси æцæг лæвар. Рахиз къухы протез чызгæн самал кодтой социалон фæдзæхстады республикон фонды æххуысæй. Операци ацыд Петербургы дзæбæхгæнæн центры. Полинайы цард куыд аивта, уый тыххæй нæ дарддæры æрмæг.
Аив æмæ бæстон æфснайд. Полина Тишковайы райсом сывæллæтты центр «Тæмискъ»-ы, иннæ сывæллæттау æмхуызон, райдайы уат равснайынæй. Дарддæр зарядкæ æмæ райсомы хæрд.
Полинайæн йæ рахиз къухы цауддзинад гуырдзæй рахасгæ у. Фæлæ у сæрæн æмæ тæлфаг. Ахуыр кæны, спорт æмæ сфæлдыстадон къорды йæхи фæлвары. Архайы æрмдæсныйады дæр. Ныр ног биоэлектрикон протезимæ уыцы фæнд дæр сæххæст кæндзæн.
Протезы раст куыст чызг йæхæдæг аразы: сæрмагонд датчиктæ йын исынц йæ нуæртты нысæнттæ. Иу милуан сомæй фылдæр чи кæны, уыцы протез самал кодтой социалон фæдзæхстады республикон фонды руаджы.
Полина йе ‘нæниздзинад фæхъæддыхдæр кодта сывæллæтты дзæбæхгæнæн центр «Тæмискъ»-ы. Ныр чызг бæллы йæ уарзон ахуыртæм. Ног протезимæ йын бæлвырд фенцондæр уыдзæн математикæ, уырыссаг æвзаг æмæ литературæйы урокты. Раздæры протез фæсонтыл фидаргæнæ уыд æмæ дзы сывæллон тынг фæллад.
Дзабыры бос абæттын, дзыккутæ бабийын æмæ уæлæдарæс раивын. Полинæ ныр ацы куыстытæ кæндзæн йæхæдæг, æнæ искæй æххуысæй. Абон, йе ‘нæниздзинад хъыгдæрд кæмæн у, уыцы адæмæн нырыккон ифтонггæрзтæ сæ цард канд æнцондæр нæ кæнынц, фæлæ ма амондджын дæр.
