Ног КТ-аппарат рæвдз кусы. Бонмæ скæны 30 иртæсты онг. Цæмæй бæлвырддæр уой, уый тыххæй та дохтыртӕ рынчыны тугдадзинты бауадзынц сӕрмагонд буаргъӕд. Æмæ уый фæрцы мидӕггаг оргӕнтӕ хуыздӕр разынынц. Беслӕны поликлиникӕйы ныридӕгӕн аргъ скодтой ног ифтонггарзæн.
Уæвгæ, уый иунæг ног ифтонггарз нæу. Иртæстытæ цы кабинетты кæнынц, уыдоны бирæ техникӕ фæзынд. Зæгъæм, аппараттӕ рентген, МРТ, маммографи ӕмӕ флюрографийӕн. Лаборатори дӕр рацарӕзтой. Æрвылбон дзы скӕнынц 100 алыхуызон анализы бӕрц. Афтæ, медицинон кусджытӕн алцыдæр æнтысы афоныл, суанг адӕмы стыр гуылфӕны рæстæг дӕр.
Бæстыхай 40 азы цалцӕггонд нæ уыд. Ныр дзы доны хæтæлтæ æмæ электрон тыхдæттæг телтæ иууылдæр раивтой. Кæрты — ног агдон. Сног кодтой поликлиникæйы разуынд дæр. Сывæллæтты поликлиникæйæн та скодтой хицæн бацæуæн, цӕмӕй хистӕртимæ иу рады ма лӕууой, уый тыххӕй.
Ацы поликлиникӕйы дзӕбӕх кӕнынц 54 мин адӕймаджы. Бонмæ дохтыртæ райсынц 700 пациенты онг, уыдонæй 100-йы бæрц — сывӕллæттæ. Ам кусынц хирургтӕ, терапевттӕ ӕмӕ реабилитацийы специалисттӕ. Уыдонæй уæлдай, кардиолог, стоматолог, уролог.
Дохтыртӕ куыд бӕрӕг кӕнынц, афтӕмӕй цалцӕджы фӕстӕсæ куыст сси бирӕ ӕнцондӕр ӕмӕ хуыздӕр. Ныр, дӕсныйады рӕзынæн ӕмӕ ӕппӕты бӕрзонддӕр ӕмвӕзадыл кусынӕн цыдӕриддӕр хъӕуы, уыдонæй иууылдæр æххæст сты. Рацарæзт ахаста 3 азы. Æхца йын рахицӕн кодтой национ проект “Дӕргъвӕтин ӕмӕ уæнгрог цард”-мӕ гӕсгӕ.
Республикӕйы медицинӕ рӕзын кӕнын у сӕйраг хӕс. Ӕмӕ уыцы куыст дарддӕр цӕуы. Ацы аз ма Цӕгат Ирыстоны сараздзысты ӕмӕ сцалцӕг кӕндзысты цалдӕр рынчындоны ӕмӕ поликлиникӕйы, уӕлдайдӕр та хъӕуты ӕмӕ районты.
