Цæрджытæн куыст ссараны паддзахадон программæйы фæлгæты 525 адæймаджы рæстæгмæ куысты нылæууыдысты. Уый тыххæй оперштабы æмбырды фехъусын кодта дзуапдæттæг комитеты сæрдар Платы Альбинæ. Ныронг райстой 52 курдиаты амалхъом адæмæй, цæмæй сын программæйы фæлгæты субсиди радтой. Куыстӕй арвитынмӕ кæй хъавыдысты, ахæм 163 адæймаджы сæ куысты бынæттæ бахъахъхъæдтой. Семæ бафыстой сæрмагонд бадзырдтæ.
Промышленносты къабазы кусджыты дæсныйад бæрзонддæр кæныны ахуыртæ ацæудзысты 64 адæймаджы. Уыдонæй 59 сты вагæттæ цалцæггæнæн заводы специалисттæ. Уый тыххæй иу кусæджы ахуыртыл бахардз кæндзысты 60 мин сомы. Оперштабы ныхас кодтой ног профессионалон дæсныйад райсыны курсытыл. Территориалон æвзарæн къамисты 45 кусæджы исынц юристы зонындзинæдтæ ЦИПУ-йы. Ахуырадон программæтæ сты уæрæх. Æппæты фылдæр цæуынц экскурсовод, хъомылгæнæг, юрист, хæрианггæнæг, кондитер æмæ сæрæлвынæджы дæсныйæдтæм.
Промышленность æмæ инвестициты министр Мæрзойты Владимир та радзырдта экономикæйы промышленнон секторы тыххæй. Кондады бæрæггæнæн афæдзы ‘рдæгмæ у 110%. Республикæйы сараздзысты фармацевтон завод. Йæ проектыл куы бакусой, уæд бавналдзысты арæзтадмæ. Министры ныхæстæм гæсгæ, эксплуатацийы завод хъуамæ радтой иннæ азы кæрон. Хъæугæ кусæнгарз ныридæгæн балхæдтой. Мæрзойты Владимир ма куыд фæнысан кодта, афтæмæй 2023 азы паддзахад Цæгат Ирыстонæн уæлæмхасæнӕн ратдзæн 100 милуаны. Æхцайæ сног кæндзысты промышленнон куыстуæттæ.
