Республикæйы хицауады сæрдары хæдивæг Александр Реутов кусæг балцы уыд Дыгуры районы. Æркаст æнæниздзинадхъахъхъæнынады къабазы уавæртæм. Вице-премьер федта, районы сæйраг рынчындоны медицинон æххуысæн цы фадæттæ ис, уый. Дигорайы поликлиникæ бындуронæй сцалцæг кодтой 2021 азы. Александр Реутов бæлвырд базонгæ хирурги, терапи, неврологи, педиатрон æмæ паллиативон хайæдты куыстимæ дæр. Сæйраг дохтыримæ æрдзырдта 2023 азы архайды хатдзæгтыл. Дарддæр вице-премьер бабæрæг кодта Дур-Дур æмæ Хъарман-Сындзыхъæуы амбулаторитæ.
Хъарман-Сындзыхъæуы амбулатори у 2022 азы амад. Уыцы аз рацарæзтой Дур-Дуры амбулатори дæр. Хатдзæгтæ кæнгæйæ, Александр Реутов Дыгуры районы æнæниздзинадхъахъхъæнынады системæйæ разыйæ баззад.
