Чингуытæ электрон хуызмæ ивынц сæрмагонд планетарон сканеры руаджы. Йæ балхæныны фадат фæци Уæрæсейы президенты гранты фæрцы. Ныр 4 азы дæргъы цæуы ахсджиаг куыст. Уыцы рæстæгмæ чиныгдоны æрмæджыты хай раивтой электрон хуызмæ. Фыццаг уал чиныджы сыфтæ скан скæнынц, стæй уæд цæмæй æнцон кæсæн уой, уымæн сын сæ хуыз раивынц. Фыццаг бакастæй æнцон хъуыддаг у, зæгъæ, фæлæ куыд разынд, афтæмæй бынтон хуымæтæг хабар нæу.
Александр Мезенцев, РЦИ-Аланийы национ зонадон чиныгдоны электрон ресурсты хайады кусæг: «Ис нæм чингуыты номхыгъд. Архайæм уымæ гæсгæ. Стæй æрмæст чингуытæ нæ ивæм электрон хуызмæ, фæлæ газеттæ æмæ журналтæ дæр. Суанг 30-æм азты уагъд газеттæ дæр. Уагæвæрдмæ гæсгæ бонмæ 200 сыфыл бакусæм. Фæлæ, хатгай фылдæр дæр рауайы. Æппæты зындæр къамтимæ кусын у. Сæ хуыз сын ивæн нæй. Æрмæджытæ вæййынц PDF-хуызы».
Хæсты рæстæджы æмæ уый агъоммæ уагъд газеттæ дæр ныр сты электрон хуызы. Ацы куыст чиныгдоны кæнынц бæстæзонадон æмæ периодикон хайæдты.
Ам та ис стæм чингуыты æмбырдгонд. Се ‘хсæн суанг 17-æм æнусы кæй рауагътой, ахæмтæ. Иугæйттæй йеддæмæ дзы нал ис. Цæмæй сæ бакæсыны фадат уа æмæ парахат кæной, уый тыххæй сæ скан кæнынц- электрон хуызмæ сæ фæлгъауынц.
Ныридæгæн хайады тæккæ зынаргъдæр æмæ стæмдæр чингуытæ, федералон æмæ регионалон ахадындзинад кæмæн ис, уыдон раивтой электрон хуызмæ. Хæстæгдæр рæстæг хайады æппæт æрмæджытæ дæр хъуамæ бахæссой электрон чингуыты архивмæ. Ног хуызы сæ ссарæн ис чиныгдоны сайты. Æнцондзинад ма уый у, æмæ сайты регистраци кæнын нæ хъæуы. Канд республикæйы нæ, фæлæ æнæхъæн дунейы дæр адæмы бон пайда кæнын у сайты æрмæджытæй.
Габеты Лианæ, национ зонадон чиныгдоны электрон ресурсты хайады разамонæг: «Нæ чиныгдоны æрмæджытæ электрон хуызмæ раивыны куыстмæ стыр æргом æздахæм. Уымæн æмæ уый руаджы ахсджиаг æмæ стæмдæр æрмæджытæ бахъахъхъæндзыстæм. Ныридæгæн 5 мин чиныджы нæм ис электрон хуызы. Уыдонæй мин сты национ электрон чиныгдоны. 3 мины та хæстæгдæр рæстæг равæрдзыстæм интернеты. Алкæй бон дæр дзы уыдзæн пайда кæнын лæвар. Электрон хуызы æрмæджыты хæрзхъæддзинад хорз кæй у, уый нын фадат дæтты федералон проект «Национ электрон чиныгдон»-ы архайын».
Уыимæ ма, чиныгдоны фæзындзæн ногдзинад. Чиныгкæсджыты курдиатмæ гæсгæ электрон хуызы сæ цы æрмæджытæ хъæуа, уыдон сын æрвидзысты. Уый руаджы æмбæлгæ æрмæджытæ ссарынæн хъæудзæн зынгæ къаддæр рæстæг. Хетæгкаты Къостайы юбилеймæ чиныгдоны электрон хуызмæ ивынц йе ‘ппæт æрмæджытæ дæр. Уыимæ ма, чиныгдоны фæнд кæнынц ирон æвзаджы интерактивон музей дæр саразын.
Хуасдзауты Алинæ
