Азæй-азмæ кондады æууæлтæ бæрзонд æмвæзадыл дарын æмæ регионы рог промышленносты егъаудæр куыстуаты ном хæссын. Дзæуджыхъæуы хуыйæн фабрикæ уадзы æфсæддонты уæлæдарæс. Фæллой дзы кæнынц 800 адæймаджы. Ныртæккæ куыстуат фæнд кæнынц фæуæрæхдæр кæнын, агурынц ног кусджыты. Адæймаджы кусын фæндæд, æндæр æй ам æппæтыл дæр сахуыр кæндзысты.
Дзаумайы цæттæ хæйттæ хъуымац кæрдæн цехæй æнæрлæугæйæ æрвыст цæуынц «ОЗАТЭ»-йы хуыйæн фабрикæйы æппæт кусджытæм. Уый у кондады фыццаг æмæ ахсджиагдæр къæпхæн. Зæгъæн ис, æмæ ацы ран куыст куыд райдайа, дарддæр дӕр афтæ ахæццæ уыдзæн. Æфсæддонтæн хуыд дзаумауыйы хъуамæ алцыдæр хæрзæххæст уа. Нырма зын бафиппайæн у, фæлæ ныртæккæ кæрдынц зымæгон къурткæйы хӕйттӕ. Æнæхъæнæй дæр хъуамæ уа иу хуыз. Уый тыххæй та йын йæ алы хайыл дæр хъæуы нысан сæвæрын.
Дарддæр, технологон фæткмӕ гæсгæ, куыст цæуы хуыйæн цæхы. Рог промышленносты егъаудæр куыстуаты нæ республикæйы фæллой кæнынц 800 адæймаджы. Алчидæр сæ уыцы иу рæстæг æххæст кæны хицæн операцитæ.
Паддзахадон хъахъхъæнынад æмæ æдасдзинады къабазы архайæг куыстуаты бирæ æууæлтæ сусæггаг сты. Бæлвырд та уый у, æмæ ам алы специалисты дæр фæнды ног дæсныйад райсын, профессионал суæвын, куысты ног æмæ бæрзонддæр къæпхæнтæм схизын. Ахæм нысанимæ ардæм æрбацыд Людмила Филатова дæр. Хуыйæн машинæйы уæлхъус фыццаг хатт ам æрбадтис. Сæрмагондæй йæ операци цыдæриддæр лыстæгдзинæдтæ домы, уыдон иууылдæр сахуыр кодта. Куыд зæгъы, афтæмæй йæ куыстмæ цæуын зивæг дæр нæ кæны.
Ног кусæг хуыздæр цы операцимæ сарæхсдзæн, уый сбæрæг кæны фæлтæрдджын технолог. Адæймаг цыбыр рæстæгмæ фæцалх вæййы æмæ райдайы исын хорз мызд. Генералон директоры хæдивæг Павел Мираковы ныхасмæ гæсгæ, кусджытæн фидынц 30-35 мины бæрц. Уыимæ иумæ – социалон лæггæдтæ. Хуыйæн фабрикæ фæнд кæнынц фæуæрæхдӕр кæнын. Уый тыххæй ныртæккæ ног кусджытӕ агурын райдыдтой.
Фæззыгон уæлæдарæс, æрвылбон дырынæн костюмтæ, футболкæтæ ам хуыйынц нæхи бæстæйы уагъд хъуымац æмæ æрмæгæй. 2021-æм азæй фæстæмæ кондады сæйраг фæткæвæрд у – тагъд æмæ хæрзхъæд архайд, æфсад куыд домы, афтæ. Зæгъæм, ацы машинæйы бæсты куыстаиккой 5-6 адæмаджы. Хуыйы дзыппытæ, биркæтӕ. Фæлæ уæддæр зын процессмæ адæймаг æнæмæнг хъуамæ йæ цæст дара.
