Астæуккаг профессионалон ахуырадон уагдæтты фæстаг курсыты студенттæн фадат фæзынд куыст ссарынæн. Уый хауы, скъолайы агъоммæ ахуырад чи исы, уыдонмæ. Ахæм закъоны проектыл абон ныхас цыд Цæгат Ирыстоны Парламенты советы.
Раздæр ахуыр кæнгæйæ йæ дæсныйадмæ гæсгæ кусыны бар уыд æрмæст дæр уæлдæр ахуыргæнæндæтты фæстаг курсыты студенттæн. Парламенты сæрдар Тускъаты Таймураз куыд фæбæрæг кодта, афтæмæй ацы ивддзинæдты сты тынг вазыгджын. Уыимæ ма расидт ахæм хъæппæрис, цæмæй иу фыццаг рæстæг æрыгон кусæгæн йæ фарсмæ фæлтæрдджын ахуыргæнæг куыд зондамонæг, афтæ æрбалæууа. Æмбырды ма ныхас цыд транспорт æмæ фæндаггон хæдзарады комитеты ивгъуыд азмæ цы куыст бакодтой, ууыл.
Комитеты разамонæг радзырдта цас фæрæзтæ æмæ цæуыл хардзконд цæуы, кæцы объектты куыст райдыдта, кæцыты та фæци, стæй ма цавæр паддзахадон программæты архайынц, уый. Тускъаты Таймураз куыд фæбæрæг кодта, афтæмæй ацы къабазы æнæмæнг хъæуы сæ куыст иттæг хорз чи зоны, ахæм специалистты цæттæ кæнын.
