Вахтанговы номыл театры директор Кирилл Крок курдиатимæ фæсидт регионы разамонæг Сергей Меняйломæ. Ракуырдта, цæмæй зындгонд режиссёры хæдзар цы уынгыл ис, уымæн йæ иу хайæн Вахтанговы ном радтой. Афтæ йæ ном хæсдзæн куыд музей, афтæ цы уынгыл ис, уый дæр. Уый тыххæй фехъусын кодтой хицауады æрвылкъуырион аппаратон æмбырды рæстæг.
Сæргълæууæг хъуыды банымадта растыл, загъта, цæмæй фарста къамисы размæ хаст æрцæуа æмæ саразой байхъуыст. Хицауады уæнгтæ ма дзырдтой Дзæуджыхъæу æмæ районты сыгъдæгдзинадыл. Регионы разамонæг куыд загъта, афтæмæй афæдзы райдианæй æнæзакъон бырондæтты тыххæй райста 85 хъасты. Ныртæккæ Беслæн æмæ Мæздæджы ивынц фæндæгты уæлцъар, уыцы хъуыддаджы дæр къуылымпыдзинæдтæ ис. Сæргълæууæг разы нæу, къæвда бон куыстытæ кæй нæ бауромынц, уымæй.
