Регионы эпидемиологон уавæр, уыимæ медицинон туаггуыры æмæ æндæр заводты арæзтад. Ацы, æмæ æндæр ахсджиаг фарстатыл æрдзырдтой аппаратон æмбырды.
«Спутник-М» вакцинæйы фыццаг парти схæццæ республикæмæ. 480 дозæйы сты 12 азæй 17 азы онг сывæллæттæн. Хæстæгдӕр рæстæг дихгонд æрцæудзысты медицинон уагдæтты ‘хсæн. Дзырдæн зӕгъӕм, Цæгат Ирыстоны бæрæг кæнынц, вакцинацийы цыд кæй æрхауд. Сергей Меняйло бабар кодта цæрджытимæ фылдæр ныхас кæнын ацы фарстайы ахсджиагдзинадыл.
Уыимæ, цæст дарын, коронавирусы ныхмæ цы нысангонд мадзæлттæ ис, уыдон куыд æххæстгонд цæуынц, уымæ. Æрдзырдтой медицинон туаггуыр уадзыны заводы арæзтадыл дæр. Ныридæгæн уал ис инвестор. Сбæрæг ын кодтой йæ бынат дæр, самал кодтой хъæугæ ифтонггæрзтæ. Заводы руаджы республикæ туаггуырæй цух не ‘ййафдзæн.
Промышленон куыстуæттæй ма иу — завод «Кристалл». Советон рæстæг ам уагътой æрхуыйæ продукци. Сæрды Сергей Меняйло бабæрæг кодта бæстыхай. Хицауадмӕ ис заводы куыст сног кæныны фӕнд. Уый æддейæ ма регионы цардмӕ уадзынц цалдæр инвестицион проекты. Регионы разамонæг бабар кодта ацы фарстайы фæдыл бацæттæ кæнын сæрмагонд æмбырд.
Сергей Меняйло фехъусын кодта, февралы бæстæйы хицауады кæй ацæудзæн ведомствоты ‘хсæн æмбырд. Æрдзурдзысты дзы, президенты бардзырдтæ куыд æххæстгонд цæуынц, ууыл. Республикон хицауады уымӕ хъуамæ уой цæттæ.
Республикæйы сæргълæууæг ма бабар кодта, йе ‘нæниздзинад хъыгдæрд кæмæн у, уыцы сывæллæттӕ бассейны архайынмæ цы сæмбӕлдысты, уыдон хæстæгӕр рæстæг аиуварс кæнын.
