Цæгат Ирыстоны цæрджытæй мобилизацимæ гæсгæ кæмæ æрсидтысты, уыдон иууылдæр мæйы кæронмæ хъуамæ фиддонтæ райсой. Ахæм уынаффæ æрвылкъуырион аппаратон æмбырды рахаста региона разамонæг Сергей Меняйло. Дзуапдæттæг ведомствотæн бабар кодта куыст фæхуыздæр кæнын, цæмæй цæрджытæ æххуысы мадзалы тыххæй хъæугæ информаци зоной. Сæргълæууæг ма куыд загъта, афтæмæй ныр аппаратон æмбырдтæ цæудзысты ног хуызы.
Ахсджиаг фарстаты фæдыл-иу раныхас кæндзысты министрадтæ æмæ районты разамонджытæ. Фылдæр информаци базонæн уыдзæн парламент æмæ хицауады æмбырдты рæстæг дæр. Закъонтæм ивддзинæдтæ хаст куы цæуа, уæд та бæрнон кусджытæ цæрджытæн æмбарын кæндзысты, ногдзинæдтæ хаст цæй фæдыл цæуынц æмæ сын цы фæстиуджытæ уыдзæн, уый.
