Сергей Меняйло æмæ Сбербанчы разамынды сæрдар Герман Греф бафыстой æмгуыстады фæдыл бадзырд. Документыл къух æрфыстой абон, Петербурджы æппæтадæмон экономикон форумы фæзуатыл. Йæ фæрцы регионы бакусдзысты ног нымæцон технологиты райрæзтыл, уыимæ ма автоматикон хуызы ногдзинæдтыл сахаддзысты. Ныхас цæуы æнæниздзинадхъахъæнынад, ахуырад æмæ æхсæнадон транспортыл. Æмгуыстады бадзырдмæ гæсгæ рæздзæн инфтраструктурæ. Æххуыс кæндзысты амалхъомадæн дæр. Форумы ма Сергей Меняйло æмæ инвестор Гуыриаты Владимир бафыстой бадзырд Дзæуджыхъæуы индустриалон парк саразыны тыххæй. Йæ фæрцы къухы бафтдзæн кондадон инфраструктурæйы сæрмагонд куыстуæттæ саразын. Республикæ йæхи ‘рдыгæй хъæугæ барадон æххуыс бакæнынмæ цæттæ у. Инвесторы ныхæстæм гæсгæ, проектыл кусгæйæ æппæт домæнтæ дæр сæххæст кæндзæн.
Уымæй уæлдай ма Петербургы æппæтадæмон форумы республикæ æмгуыстады бадзырд бафыста акционерон æхсæнад «Медскан»-имæ. Сæрмагонд документмæ гæсгæ, Цæгат Ирыстоны бакусдзысты ног технологитимæ инновацион медицинæйы райрæзтыл. Нырыккон медицинон объекты райрæзтæн архайдзысты республикæмæ инвестицитæ раздахыныл. Документы бын сæ къухтæ æрæвæрдтой республикæйы сæргълæууæг Сергей Меняйло, Компаниты къорд «Медскан»-ы директорты советы сæрдар Евгений Туголуков æмæ инвестор Гуыриаты Владимир. Æмгуыстады бадзырдмæ гæсгæ регионы фæзындзæн нырыккон бирæвæрсыг медицинон центр, реабилитацион центр. Фидæны ма фæнд кæнынц ядерон медицинæйы лæггæд кæнын. Уый руаджы фæкъаддæр уыдзысты зæрдæйы æмæ дадзинты низтимæ баст æвзæр фæстиуджытæ. Уымæй уæлдай ма, форумы фæзыл уыд мониторингы хатдзæгты презентаци. Снысан æй кодта стратегион хъæппæристы агентад. Цæгат Ирыстон бацахста 14 бынат Уæрæсейы субъекты ‘хсæн инвестклиматы националон рейтингы. Бæрæггæнæнтæ æмбырд кодтой 2014 азæй фæстæмæ. Бахастой йæм цыппар къабазы.
