Сергей Меняйло амыдта æрвылкъуырион аппаратон æмбырд

Иумæйаг паддзахадон фæлварæны сæйраг æмгъуыд кæронмæ æрхæццæ æнæ къуылымпытæй. Зæгъын хъæуы уый, æмæ рæстæмбис нымадмæ гæсгæ математикæйæ балл сырæзт 5 пункты. Абоны бонæй та райдыдтой уæлæмхасæн бонтæ. 8 æмæ 9 июлы рауагъдонтæн фадат ис сæ бæрæггæнæнтæ фæхуыздæр кæнынæн иу предметæй. Уый тыххæй аппаратон æмбырды фехъусын кодта ахуырад æмæ наукæй министр Алыбегты Эллæ. Ног ахуыры азмæ цæттæ кæныны рæстæг ныридæгæн райдыдта. Арæзтады министрады хъæппæрисмæ гæсгæ регионы фæзындзысты архитектурон-арæзтадон кълæстæ. Проект æххæст кæнынц профилон министрад Цæгат Кавказы хæххон металлургон институт æмæ Цæгат Кавказы арæзтадон техникумимæ иумæ. Архайдзысты дзы 3 скъолайы. Уыимæ ма 9 скъолайы та суыдзысты проект “Математическая вертикаль”-ы архайджытæ, ома бындуронæй математикæ æмæ инженерон дисциплинæтæ ахуыр кæныны хъуыддаджы. Сергей Меняйло ма бабар кодта райдиан кълæсты ахуырдзаутæн программæйыл бакусын – “Математический старт”, зæгъгæ.