Сергей Меняйло бахатыд мидхъуыддæгты æмæ æнæнхъæлæджы уавæрты министрадтæм, цæмæй социалон хызæгты цы мæнг информаци парахат кæнынц, уыимæ хуыздæр тох кæной.
Хицауады аппаратон æмбырды республикæйы сæргълæууæг бабар кодта уæлдай тынгдæр цæстдард оперативон уавæрмæ здахын. Куыд фæбæрæг кодта, афтӕмӕй дыууæ фæстаг боны цаутæ ууыл дзурæг сты, фейктæ кæй сбирæ сты. Сæ сæйраг нысан у цæрджыты сызмæнтын. Барадхъахъхъæнæн органтæ та хъуамæ сабырдзинадмæ æрмæст дзыллон мадзæлтты ма кæсой, фæлæ ма интернеты тыгъдады дæр.
Уымæй уæлдай ма æмбырды куыд рабæрæг, афтæмæй 57 мин сывæллоны исынц хъарм хæринаг регионы скъолаты. Уый тыххæй радзырдта ахуырад æмæ наукæйы министр Алыбегты Эллæ. Цæгат Ирыстоны бакуыстой иумæйаг меню саразыныл. Йæ хæрзхъæддзинадмæ æппынæдзух кæсы дзуапдæттæг министрад. Фæлæ муниципалитетты скъолатæм хæринæгтæ ласынц амалхъом адæймæгтæ дæр. Уый та, министры ныхæстæм гæсгæ, гæнæн ис, æмæ хæринаджы хæрзхъæддзинадыл фӕбӕрӕг уа. Сергей Меняйло бабар кодта, фæлхасадон комбинатты филиалтæ районты байгом кæнын æмæ къæпхæнгай уыдонмæ рахизын.
