Абон нæ равдыст райдайдзыстæм æхсызгон цауæй. Национ телеуынынад «Осетия-Ирыстон» бæрæг кæны йæ юбилей. Телевизормæ кæсджытæн 5 азмæ нæ зæрватыкк сси уарзон. Телекомпанийы кусджытæн арфæ ракодта нæ республикæйы сæргълæууæг Сергей Меняйло. Куыд загъта, афтæмæй уыцы рæстæгмæ æппæт кусджытæн дæр иумæйагæй бантыст адæмы зæрдæтæм фæндаг ссарын. Хабæрттæ, аналитикон æмæ ахуырадон проекттæ, документалон кинотæ æмæ бирæ æндæр цымыдисаг æрмæджытæ. Телекомпанийы кусджытæн кæддæриддæр æнтысы республикæйы цæрджытæм рæстаг хабæрттæ хæццæ кæнын, загъта Сергей Меняйло.
Уæлдай ныхасы аккаг сты ирон æвзагыл цы проекттæ цæттæ кæнут, уыдон. Банымайæн сæ ис ирон æвзаг парахат кæныны æмæ хъахъхъæныны ахадгæ фæрæзыл. Мæ зæрдæ дарын, ахæм æнтыстджын куыст кæй кæндзыстут дарддæр дæр, мах та йын уыдзыстæм аргъгæнджытæ, фæнысан кодта сæргълæууæг.
