Гуманитарон æххуыс ласыны сæрмагонд фæтк снысан кæнын. Ахæм хæс хицауады уæнгты раз аппаратон æмбырды рæстæг сæвæрдта Цæгат Ирыстоны сæргълæууæг Сергей Меняйло. Йæ ныхæстæм гæсгæ, ныртæккæ дæр нæ хæдтулгæтæ Донецкы æвдæлон кæнынц. Донбассы цæрджытæн æмæ ирыстойнаг æфсæддонтæн гуманитарон æххуыс æрвитын хъæуы æрмæст сæрмагонд цæстдардимæ. Вице-премьер Тугъанты Ларисæйы ныхæстæм гæсгæ, ныртæккæ республикæйы ис 308 лигъдоны Луганск æмæ Донецкы адæмон республикæтæй. Уыдонæй 182 — сывæллæттæ, 100-йæ фылдæр та хистæр кары адæм. Уыдонæй куысты ныллæууын кæй фæнды, ахæмты номхыгъд быцæттæ кæнын бабар кодта регионы разамонæг.
Хицауады сæрдары хæдивæг Томайты Ирбег куыд фехъусын кодта, афтæмæй Арвыкомы фæндаг у гом. Сæ радмæ æнхъæлмæ кæсынц 2300 уæзласæн хæдтулгæйы шофыры. Сергей Меняйло дзуаппдæттæг ведомствотæн бахæс кодта æппæт хуызты хæдтулгæтæн дæр сæрмагонд уагæвæрд скæнын, цæмæй ма бирæ кæной. Уымæй уæлдай, ацы фарстайы фæдыл æмгуыст кæнын Кæсæг-Балхъары ведомствотимæ. Шофыртæм та фæкæсын дон æмæ хæринагæй.
Уæрæсейы фæлхасгæнджытæм цæстдарды регионалон управленийы разамонæг Тыбылты Аланы ныхæстæм гæсгæ, коронавирусæй рынчынтæ фæкъаддæр сты 28,9%. Уавæр зынгæ фæхуыздæр. Ныртæккæ республикæйы дзæбæхгæнæндæтты ис 122 пациенты ковидимæ.
Цæгат Ирыстоны сæргълæууæг фæбæрæг кодта æхсæнадон æмæ улæфæн бынæтты уавæр дæр. Районты разамонджыты Æрдзон æвæрæнты æмæ цæрæнуæтты коммуналон хæдзарады министрадтимæ иумæ хъæуы цыртдзæвæнты æмæ мемориалты алфамбылай аивгæнæн куыстытæ снысан кæнын.
Ивгъуыд аппаратон æмбырды Сергей Меняйло бабар кодта 15-æм апрелы онг бацæттæ кæнын æппæт рацаразинаг скъолаты фæдыл контракттæ. Ахæм æмгъуыд лæвæрд æрцыд, национ æмæ федералон программæты æххуысæй цы объекттæ араздзысты, уыдонæн дæр. Дзуапптæттæг ведомствотæй куыд фехъусын кодтой, афтæмæй æппæт контракттæ дæр сты цæттæ.
Къуырийы дæргъы та регионы разамонæг сбæрæг кæндзæн Дзæуджыхъæуы сæйраг парк, Жуковскийы номыл парк æмæ Доны станцæйы цæттæдзинад.
