Сергей Меняйлойы разамындæй ацыдис промышленнон продукцийы æнæзакъон зилдухы ныхмæ къамисы æмбырд. Йæ архайджытæ 2025-æм азы куыстæн скодтой хатдзæгтæ, снысан кодтой фидæнмæ нысантæ. Республикæйы разамонæг куыд бафиппайдта, афтæмæй къамисы куыст ахсджиаг у, дзуапп дæтты фæлхасадон базарадмæ цы промышленнон æмæ хъæууонхæдзарадон продукци бахауы, уымæн. Йæ хæрзхъæддзинад хъуамæ дызæрдыккаг ма уа, адæмы æнæниздзинадыл æвзæры ‘рдæм ма сахада æмæ республикон бюджетæн зиан ма æрхæсса. Æнæниздзинадхъахъхъæнынады къабазмæ цæстдарды федералон службæйы территориалон оргæны бæрæггæнæнтæм гæсгæ, ведомствæ дзуапдæттæг æмгъуыдмæ скодта 794 контролон-цæстдарæн æмæ профилактикон мадзалы. Радтой 586 сыфы æнæмæнг домæнтæ сæххæст кæныны фæдыл. Æмбырды кæронбæттæн Сергей Меняйло радта бæлвырд амынддзинæдтæ хицауады уæнгтæ æмæ дзуапдæттæг ведомствæтæн.
