Сергей Меняйлойы разамындæй уыд, æнæнхъæлæджы уавæртæй бахъахъхъæныны æмæ зынгсирвæзтытæ ма ‘руадзыны фæдыл къамисы

Сергей Меняйлойы разамындæй уыд, æнæнхъæлæджы уавæртæй бахъахъхъæныны æмæ зынгсирвæзтытæ ма ‘руадзыны фæдыл къамисы æмбырд. Сæйраг фарстаты ‘хсæн — туристон объекттæ æмæ федералон нысаниуæгимæ фæндæгтæ зымæгон рæстæг. Æнæнхъæлæджы уавæрты министрады бæрæггæнæнтæм гæсгæ, Дзæуджыхъæу – Уæллаг Ларс фæндагыл ис хъармгæнæн 16 стационарон пункты æмæ уæзласæн хæдтулгæтæн 3 уромæны. Бынат дзы ис транспорты 1 мин 150 иуæгæн. Бахъуаджы сахат Уæллаг Ларсы ‘рдыгæй æмæ Дзæуджыхъæу – Архонкæ фæндагыл цæттæ сты ноджы дыууæ уæлæмхасæн хъармгæнæн пункты. Сергей Меняйло бабар кодта зæйтæ рацæуынæй тæссаг бынæттæ сбæрæг кæнын, уæлдай æргом аздахын транспорты змæлдыл фыдбылыз кæм сахаддзæн, уыцы территоритæм. Ноджы ма иу темæ – стурвосы ‘хсæн буары низтæ парахат кæнынæй тæссаг кæй у, уыцы хъуыддаг. Уый тыххæй фехъусын кодта республикæйы ветеринарийы управленийы разамонæг Кокойты Сослан. Ныридæгæн уый фæдыл скодтой сæрмагонд иртæстытæ, дарддæр сæ арвитдзысты цæрæгойты æнæниздзинад хъахъхъæныны федералон центрмæ. Низы хъæд сбæрæг кæнын æмæ йæ парахат кæнын ма руадзынæн специалисттæ аразынц хъæугæ мадзæлттæ.