Сергей Назаров ӕмӕ Дзанайты Барис сарӕзтой кусӕг ӕмбырд республикӕйы социалон-экономикон фарстаты фӕдыл

Уӕрӕсейы экономикон райрæзты министры хӕдивӕг Сергей Назаров ӕмӕ Цӕгат Ирыстоны премьер-министр Дзанайты Барис сарӕзтой кусӕг ӕмбырд республикӕйы социалон-экономикон фарстаты фӕдыл. Уæлдай æргом — курорт «Мамысон»-ы фидæнмæ. Ныртӕккӕ дзы кусы дыууӕ рæтæн фӕндаджы ӕмӕ 19 километры трассӕтӕ, ныридæгæн суазæг кодта 87 мин адæймагæй фылдæр. Сӕрмагонд экономикон зонӕйы кусы 17 резиденты, ис дзы сӕдӕ модулон фысымуатӕй фылдӕр 700 бынатимæ. Ацы туристон комплексы райрӕзтӕн ӕнӕбюджетон инвестициты гуырахст сырæзт 6,2 миллиард соммӕ. Кластер фӕуӕрӕхдӕр кӕныны куыстытӕ дарддӕр цӕуынц. Республикӕйы хицауады сæрдар рæгъмæ рахаста æндæр къабæзты раззагдæр проекттæ дæр — хъӕууон хӕдзарады, логистикӕйы ӕмӕ транспорты. Дыккаг кварталы хатдзӕгтӕм гӕсгӕ инвестициты иумӕйаг бæрц хъæппæристæ сæххæст кæнынæн 64 миллиард сомӕй фӕфылдӕр, уыимӕ 50 миллиарды онг сты ӕнӕбюджетон фӕрӕзтӕ. Проекттӕ куы фæзындысты, уӕдӕй фӕстӕмӕ регионы арӕзт ӕрцыд дыууӕ минæй фылдæр ног кусӕн бынӕттӕ. Ӕмбырды уæлдай ӕргом аздӕхтой коммуналон инфраструктурӕйы модернизацимӕ. 2023 азӕй Цӕгат Ирыстоны сног кодтой 318 километрӕй фылдӕр дондзæуæн хызтӕ, 103 км дондæттæн ӕмӕ 69 хъармгӕнӕн, фидаргонд цӕуы фиддонты хыгъды нырыккон системӕ. Хатдзæгтæ ныридӕгӕн ис: коммуналон лӕггӕдты ӕмбырдкӕнынад сырӕзт 91% онг, уый у пълангонд бӕрӕггӕнӕнтӕй дӕр уӕлдӕр.