Спортивон фестиваль «Железный веер» ныр 4-æм аз Дзæуджыхъæумæ æрбамбырд кодта уазджыты Белгород, Краснодар æмæ Стъараполæй. Цæгат Ирыстойнаг спортсментимæ сæ тыхтæ бавзæрстой цымыдисаг япойнаг спорты хуызæй – айкидойæ. Гом ерысты уæлдай ма мадзалы фæлгæты сарæзтой дæсныйад æвдисæн ахуыртæ дæр.
Влада Сердиновайæн йæ алы тренировкæ дæр райдайы разминкæ æмæ спарингтæй. Цымыдисаг япойнаг спорты хуыз – айкидо – бирæ уарзы. Уæлдай зæрдæргъæвдæй бацархайы ерысты дæр. Айкидойы фестиваль «Железный веер» дæр дзы нæ аирвæзт. Æрыгон спортсменкæ дзы архайдта 4-æм хатт.
Фестивалы архайæг Влада Сердинова: «Зын у ацы спорты хуызы архайын, фæлæ уæддæр мæ зæрдæмæ тынг цæуы. Æрæджы уыдтæн Краснодары, архайдтон ерысты æмæ дзы айкидойы фыццаг къæпхæн, дан кæй хонынц, уый райстон».
Дзæуджыхъæумæ фестивалы бацархайынмæ спортсментæ ссыдысты Белгород, Стъарапол æмæ Краснодарæй. Æдæппæтæй 16 къорды. Архайджыты ныхæстæм гæсгæ, тынг рагæй фæнд кодтой ацы ерыстæм ссæуын æмæ сын æхсызгон у, сæ фæндтæ сæ къухы кæй бафтыдысты, уый.
Ацы спорты хуызы бирæты фæнды уæлдæр къæпхæнтæм схизын. Айкидойæ сæ бон архайын у куыд сывæллæттæн, афтæ карджын адæмæн дæр. Ныртæккæ айкидойы ис 300-мæ хæстæг спортивон фæзылды. Нæ республикæйы айкидойы федерацийы президент Савины Вячеслав ныхæстæм гæсгæ, ахæм фестивальтæ æнæмæнг хъæугæ сты. Спортсментæн дзы фадат вæййы сæ дæсныйад фæуæлдæр кæнынæн.
РЦИ-Аланийы айкидойы федерацийы президент æмæ техникон директор Вячеслав Савин: «Ацы фестиваль сарæзтам 4-æм хатт. Цæуы нæм алы кары адæм, уыдон дæр сæхи фæлварынц ацы спорты хуызы. Фидæнмæ нæм бирæ пълæнттæ ис. Фæнд кæнæм ацы фестиваль иннæ аз егъаудæр скæнын».
Фестивалы кæрон жюрийы уæнгтæ равзæрстой хуыздæрты. Схорзæхджын сæ кодтой кады гæххæттытæ æмæ уæлахиздзауты кубоктæй.
