Райсом стадион «Спартачы» нæ республикæйы командæ «Алани» акæндзæн радон хъазт. Уазæгуаты нæм æрцæудзæн дагестайнаг «Анжи». Раздæр куыд хъусын кодтам, афтæмæй ивгъуыд хъазтмæ æрæмбырд 15 мин адæймаджы. Ацы хатт дæр та хъуамæ къаддæр ма уой. Фæлæ командæйы президент Гæбулты Владимир куыд зæгъы, афтæмæй ныр адæмы трибунæтæм бауаддзысты бæрæг фæткмæ гæсгæ. Раздæры хъазты фæстæ сæхгæнын бахъуыд Скæсæйнаг трибунæйы уæллаг хай. Ахæм фæнд рахастой, заууат уавæры кæй ис, уымæ гæсгæ.
Футболуарзджытæн бадыны фадат уыдзæн дæллаг хайы. Æмткæй райсгæйæ, трибунæйы сæ бон бадын у 13 мин адæймагæн. Фæлæ ныр гом уыдзæн æрмæстдæр йе `рдæг. Уымæ гæсгæ, футболмæ цæуынвæнд чи скæна, уыдоны билеттæ бахъæудзæн рагацау балхæнын.
Футболон командæ «Алани Дзæуджыхъæуы»-ы президент Гæбулты Владимир: «Дæллаг хай уымæн равзæрстам адæмæн, æмæ йæ бын æнцайы зæххыл. Æдас дзы у. Кæд æрбацæуджыты къæвда бахъыгдара, æндæр… Уый уымæн, æмæ трибунæйы амынд хай гом арвы бын ис. Адæм семæ зонтыччытæ æмæ къæвдайæ хъахъхъæнæг уæлæдарæс куы `рбахæссой, уæд сæ ниц бахъыгдардзæн».
