Дзæуджыхъæуы райдыдтой Уæрæсейы егъаудæр IT-проект – конкурс «Цифровой прорыв», зæгъгæ, уый æрдæгфиналон ерыстæ. Архайдтой дзы 46 адæймаджы Цæгат Ирыстон æмæ Кæсæг-Балхъарæй. Уыдон кусынц æнæниздзинад хъахъæнынад æмæ паддзахадон разамынды къабазæн нымæцон продукттæ рауадзыныл. Хъуамæ сыл бакуыстаиккой 36 сахаты. Уыйфæстæ сæ хъæудзæн сæ проекттæ бахъахъхъæнын. Ерысты чи фæуæлахиз уа, уыдон араст уыдзысты конкурсы кæронбæттæнмæ. Цæудзæн фæззæджы, Хъазаны. Республикæйы Хицауады сæрдар Тускъаты Таймураз куыд загъта, афтæмæй тæккæ æнтыстджындæр куыстытæй Цæгат Ирыстоны дæр спайда кæндзысты.
РЦИ-Аланийы хицауады сæрдар Тускъаты Таймураз: «Нæхицæн уынаффæ рахастам, экономикæйы министрадæн радтам хæслæвæрдтæ, уæдæ иннæ министрадтæн дæр, цæмæй уæлахидзауты куыстытæм æркæсой æмæ сын скæной хатдзæгтæ. Цæмæй уыцы регионалон проекттæ уый фæстæ царды уадзын нæ бон уа».
