Скъолатæм хæстæг æвæрд æрцæудзысты сывæллæтты хуыз конд макеттæ. Дзæуджыхъæуккаг æмæ Алайнаг епархи Паддзахадон автоинспекцийæн радта 10 макеты.
Ахæм хуызы шофырты разæнгард кæндзысты фæндагты æгъдæуттæ æххæст кæнынмæ. Скъолайдзауты хуызы конд макеттæ сæвæрдзысты тæссагдæр рæтты. Фыццаджыдæр та ахуыргæнæндæттæм хæстæг фæндæгтыл. Ног нысантæ фæнд сæ кæнынц иу ранæй иннæмæ ивын, сæ нымæй та фылдæр кæндзæн. Ахæм акци Цæгат Ирыстоны ффыццаг хатт уыдзæн. Статистикæйы бæррæггæнæнтæм гæсгæ ацы азы 4 мæймæ республикæйы фæндæгтыл æрцыд 20 фыдбылызы. Се ппæты дæр хъыгдард баййæфтой сывæллæттæ. 11-сы дзы сывæллæттæ уыдысты бæлццæттæ, 9-ты та фистæгцæуджытæ.
Цæгат Ирыстоны паддзахадон автоинспекцийы управленийы хицау Хуадонты Айвар: «Ахæм хуызы нæ фæнды, цæмæй шофыртæ, макеттæ цы ран æвæрд сты, уым уæлдай къæрцхъус уой. Сывæллæтты хуызы конд макеттæ фæндаджы сæрты ахизæнты нысантыл æвæрд нæ уыдзысты – фæлæ сæ цуры. Цæмæй йæ иууылдæр æмбарой уыцы бынаты фыдбылыз æрцæуынмæ бирæ кæй нæ хъæуы, уый».
