Георгийыл нырма 8 азы цæуы. «Адæймаг æмæ æнæниздзинад» къорды æппыты кæстæр у. Фæлæ йæ йæ кар нæ хъыгдары адæймаджы буары сконд иртасын, фыццаг медицинон æххуыс бакæнын зонын æмæ цардыуаджы бындуртæ ахуыр кæнын. Цымыдисаг та уый у, æмæ сывæллон йæ цард медицинæимæ сбæттынмæ нæ хъавы, ацы зонындзинæдтæ йæ хъæуынц иумæйаг райрæзтæн. Фидæны лæппуйы фæнды инженер суæвын.
Фылдæр ацы курс ацæуынц фидæны дохтыртæ æмæ биологтæ. Кæй зæгъын æй хъæуы, æнæ теорийæ гæнæн нæй. Уроктæ вæййынц цымыдисаг. Сывæллæттæ сæ арæхстдзинад æрмæст манекентыл нæ, фæлæ ма сæ кæрæдзиуыл дæр фæлварынц. Сбарынц туджы æлхъывдад, пульс, ахуыр кæнынц медицинон процедурæтæ æмæ зæрдæйы реанимаци кæнын.
Уыцы иу рæстæг райрæзты центры ис æндæр здæхтытæ дæр. Зæгъæм, физикон-химион. Не сфæлдыстадон къорд аудиторимæ куы бахызт, уæд дисы бацыд сæ авналæнтæй. Ам сывæллæттæн фадат ис ныррыккон кусæнгæрзтыл фæлварæнтæ кæнын. Фæсивæд зайын кæнынц хъуына – иртасынц хъæууон хæдзарадæн цы пайда у, уый. Уыимæ ма ахуыр кæнынц чырæгтæ куыд дих кæнынц, уый.
Ам та аивамоделировани у. Архайды сæйраг нысан – хи цæстæй фенын, дæ конд конструкци зæххæй куыд стæхы, уый.
Хæдтæхджытæ аразынц алы æрмæджытæй. Пластик, хъæдæрмæг æмæ ма суанг хойраджы пленкæйæ дæр. Фыццаг сывæллæттæ ахуыр кæнынц проектировани, æрмæст уый фæстæ ис фæлварæнмæ рахизын. Центр уæлдай сæрыстыр у æрмдæсныты æрмадзæй. Ам хъахъхъæнынц рагон традицитæ.
Ацы зæрдæмæдзæугæ хъазæн Баситы Лаурæ сарæзта 10 минутмæ. Чызг – “æцæг нывгæнæг” – афтæ йæ фырбуцæй хоны йæ ахуыргæнæг. Æлыгимæ ныр цыппар азы архайы. Уыцы рæстæгмæ скодта цымыдисаг æмæ хъæлдзæг дзауматæ. Йæ куыстытæ центр “Альтаир”- æн сты хæзнатæ.
Дурынгæнæджы куыстмæ фылдæр цæуынц 5 -æм æмæ 6-æм кълæсты ахуырдзаутæ. Педагогы ныхасмæ гæсгæ, æлыг домы быхсондзинад æмæ сабырдзинад. Уымæй райдыдта Тарханты Аслан дæр.
Уый æрмæст сфæлдыстадон здæхтыты чысыл хай у. “Альтаир”- ы ма ахуыр кæнынц сыгъзæринæй бийыныл, хъæдæрмæгыл нывæфтыдтæ кæныныл, къуымбилимæ архайыныл. Фæлæ æппæты аивдæр æмæ рагондæр – национ кæлмæрзæнтæ цæттæ кæныныл. Ацы æрмдæсныйад фæзынд 18-æм æнусы. Чызджытæ пайда кæнынц зæлдаг æндæхтæй, даргъ судзинтæй æмæ тъæпæн фæйнæгæй. Иу кæлмæрзæн скæныныл дыууæ мæйæ къаддæр нæ ацæуы.
Скъоладзауты æмæ педагогты хуыздæр куыстытæ сæмбырд кодтой равдыст “Сокровище нации”-йы. Ныридæгæн экспозици цалдæр азы рæзы æмæ уазджыты зонгæ кæны Ирыстоны культурæимæ. Здæхтыты хицæндзинад схонæн ис кæрæдзиуыл баст кæй сты, уый.
Фæлæ æппæты цымыдисагдæр здæхт – картинг. Уый æрмæст ерыстæ нæ, фæлæ у æххæст инженерон æрмадз. Æнахъомтæ аразынц, æмбырд кæнынц хæдтулгæтæ æмæ æппынæдзух архайынц ерысты. Æгъуызарты Дианæ ахуыр кæны 7-æм къласы. Тагъддугъ ын бауарзын кодта йæ хистæр æфсымæр. Чызджы ныхасмæ гæсгæ æппæты фылдæр уарзы тагъдад.
“Альтаир” – æрбангом кодта 18 нырыккон здæхты. 5-æй 18 азы онг, кæуыл цæуы, уыцы сывæллæттæ ахуыр кæнынц промышленнон дизайн, робототехникæ, хайтек, агро – биоквантум æмæ ма профиль “Экологи æмæ мониторинг”. Центр æмгуыст кæны колледжтæ æмæ уæлдæр ахуырадон кусæндæттимæ – аграрон университетæй медицинон академийы онг. Уый скъоладзаутæн фадат дæтты фæлтæрдджын ахуыргæнджыты разамындæй ахсджиаг проекттыл кусын.
Ахæм хуызы кусæндон архайы 2022-æм азæй. Ног бæстахæйттæ арæзт æрцыдысты “Беслæны райрæзт”- ы генералон пъланы фæлгæты. Æдæппæтæй сты æртæ – техниктæн, æрдз иртасджытæн æмæ 5-æм скъолайы бындурыл сфæлдыстадон филиал.
