Тагъд æмæ æнæ къуылымпытæй ныр Тæмисчъы цæрджытæ пайда кæнынц интернетæй. Ахæм хъуыддагмæ рагæй бæллыдысты. Паддзахадон лæггæдты фылдæр хай дунеон хызæджы фенæн кæй ис, уый дæр адæмæн сæ къух сарæзта. Кæд раздæр нырыккон технологитæй цух уыдысты, уæд сæ ныр пайда кæнынц зæрдиагæй. Ацы бонты Тæмисчъы тагъдкусгæ интернет æмæ интерактивон телеуынынады куыст сбæрæг кодта дзуапдæттæг комитеты разамонæг Сæлбиты Алан.
Интернеты тыгъдады уыцы-иу минутмæ алыхуызон цымыдисаг æмæ пайда информаци ссарын. Тæмисчъы цæрджытæ ахæм хорзæхæй фæхайджын сты. Тагъдкусгæ интернет æмæ интерактивон телеуынынадæй адæм куыд пайда кæнынц, уый сбæрæг кæнынмæ абалц кодта республикæйы информацион технологиты æмæ бастдзинады управленийы сæргълæууæг Сæлбиты Алан. Кусæндоны фæрцы нырыккон технологитимæ æмдзу кæнын райдыдтой бынæттон цæрджытæ. Сабиты зæрдæтæ – хъæлдзæг, хистæртæн та ахæм лæггад – æнцон æмæ ахадгæ.
Сæлбиты Алан фембæлды рæстæг бæлвырд бинонты дæнцæгыл адæмæн бамбарын кодта, нымæцон тыгъдад канд пайда кæй нæу. Хъуамæ дзы адæм сæхи хизой алыхуызон цæстфæлдахджытæй. Уыдон дзы тынг сарæх сты. Управленийы разамонæг сæ бахызта ахæмты хъуыддæгтæй. Фæлæ тæрсын нæ хъæуы ногдзинæдтæй. Нырыккон технологиты гæнæнтæ тынг уæрæх сты.
Поселочы хæдзæртты интернет фæзынд ног, 2021 азы размæ. Нырыккон технологитæй пайда кæнынц 20 хæдзарæй фылдæр. Сæлбиты Аланы ныхæстæм гæсгæ, Тæмисчъы хал тагъд рæстæджы ахæрдзысты иннæ хъæутæ дæр. Ууыл кусынæй управленийы зæрдæ бавæрдтой.
