Фыццаг æркастæй æнцон зыны. Кафты фæзилæнтæ фæсивæд ныфсджынæй æххæст кæнынц. Сæ фарсмæ фæлтæрдджын ахуыргæнæг, уый сын, æнæмæнг, бацамондзæн, раст архайын куыд хъæуы, уый. Гом урокы ныййарджытæ фенынц ахуырты мæйы хатдзæгтæ. Кӕстӕр къорд равдыста цалдӕр кафты элементтæ.
Ацы студи хореограф Тедеты Владимир Горӕтгӕрон районы культурӕйы галуаны байгом кодта афæдз размæ. Бæстыхайы цалцӕджы тыххæй ахуыртæ рæстæгмæ цæуынц Октябрьскæйы 1-æм скъолайы. Ирон хореографи бындур у, зӕгъы Тедеты Владимир. Фӕсивӕдӕн ныридӕгӕн сӕ бон у аив лӕууын, раст архайын ӕмӕ сӕ къухтӕ рæсугъд исын. “Сывӕллӕттæн зӕрдӕйы ӕмӕ уды хъарм лæвар кæнын хъæуы”, -зæгъы Владимир. Фӕлӕ сӕйрагдӕр у хорз фæсивæд схъомыл кæнын.
Тедеты Владимиры студийы архайы 200 сывӕллонӕй фылдӕр. Исынц 6-æй 13 азы онг æнахъомты. Лӕппутӕ ӕмӕ чызджытӕ репетици кӕнынц хицӕнтӕй — ахӕм у хореографы методикӕ. Владимир 30 азы ис кафты дунейы. Национ аивадмӕ уарзондзинад лӕппуйӕн йӕ фыд бауарзын кодта. 8 азӕй фӕстӕмӕ йӕ ахуыр кодта йæхæдæг.
Владимиры фыццаг коллектив сси районы ансамбль “Бæркад”. Уый фӕстӕ кафыд “Дети гор”-ы, “Горец”-ы ӕмӕ Гуырдзыстоны паддзахадон ансамбль “Сухишвили”-йы къордты. Фӕсарӕнты акуыста 3 азы, уый фæстæ æрыздæхт йæ райгуырæн бæстæмæ. Ӕмӕ 8 азы снывонд кодта Цӕгат Ирыстоны таможняйӕн. Фӕлӕ йæ уӕддӕр сфӕлдыстад йӕхимӕ ‘лвæста. Афӕдзы ӕрдӕджы размӕ та Владимиры къухы бафтыд ноджы иу æнтыстдзинад. Паддзахадон ансамбль “Абхазети”-йӕн цы композици сӕвӕрдта, уый рауад зæрдæмæмдзæугæ. Бахаста йæм хонгæ, тымбыл æмæ ерысы кæфтыты элементтӕ.
Владимиры хъомылгӕнинӕгтӕ хорз бæрæггæнæнтæ равдыстой. 100 æнахъомæй фылдӕр ӕнтыстджынӕй бацархайдтой фӕстаг дзӕнгӕрӕджы. Фӕлӕ уый кæронбæттæн нæ уыд. Сывӕллӕттӕ дарддӕр цӕуынц репетицитӕм ӕмӕ сӕхи цӕттӕ кӕнынц районы фидӕны мадзӕлттӕм.
