Мультипликацион сериалы фыццаг кадртæ куыддæр экраныл фæзындысты, афтæ сабитæ ныссабыр сты, се ‘ргом аздæхтой ирд фæлгонцтæм. Чысыл Тимми фыццаг серийы сабиты зонгæ кæны йæ цардимæ. Иронау. Хъайтар йæ ныййарджытимæ æрцардысты ног хæдзары, ам ссардта æмбал кæмæн нæй ахæм æнахуыр æрмкъух. Сæйрагдæр та базыдта сæ гараж удæгас кæй у, уый.
Ивгъуыдæй зындгонд инженерты разамонæг, йæ хæлæрттæ та инженерикстæ. Газ, Диз, Мозго, Рема и Тяга. Удæгас гаражы сæйраг инженер сси Тимми. Ам цæуынц хъазæнты æппæт цымыдисаг цаутæ. Фыццаг дыууæ серийы ирон æвзагыл премьерæ ацыд нæ телеканалы студийы. Егъау куыстæн аргъ скодтой чысыл уазджытæ.
Æмæ ирд æнкъарæнтæ канд кæстæртæ нæ райстой, фæлæ сæ ныййарджытæ дæр.
Уымæй уæлдай ма мультсериалы ахуыр кæнынц иумæйаг куыстыл хæлар уæвын æмæ иудзинады ахсджиагдзинадыл. Ныридæгæн 26 серийæ сæ фылдæр тæлмацгонд æрцыдысты. Ирон æвзаджы тексты автор – республикæйы сгуыхт журналист, амонæг Хъулаты Юрий.
Фæлæ дубляжы актертæ сæ размæ æвæрд хæстæ иттæг хорз бакодтой. Театр “Саби”-йы актертæ, республикæйы адæмон артисткæ Къæболты Маринæ, Дарчиты Хетæг, Гагулаты Сослан. 20 фæлгонцæй фылдæр та сдзырдтой нæ телекомпанийы амонæг Берозты Алинæйы хъæлæсæй.
Сфæлдыстадон къордæн сæ куысты рæстæг зынгæ æххуыс бакодта Цæгат Ирыстоны культурæйы сгуыхт кусæг Газайты Зойæ. Проекты креативон продюсер Мæхъиты Иннæ. “Удæгас гараж”-ы фыццаг сери нæ телеканалы эфиры рацæудзæн 30-æм декабры. Фенæн æй уыдзæн 8-æм январы онг. Кусгæ бонты райсомы 8 сахатыл æмæ сихорæй 13 сахаты фæстæ. Фæлладуадзæн бонты та райсомы 8 сахатыл æмæ 13 сахатыл.
Сфæлдыстадон къорды уæнгтæ куыд радзырдтой, афтæмæй мультфильмтæ тæлмац кæныны хъуыддаг юридикон æгъдауæй æнцон нæу. Ис дзы бирæ фæзилæнтæ. Фæлæ командæ зæрдæ бавæрдтой, сæ ног куыстытæй дарддæр дæр рухс кæндзысты адæмы зæрдæтæ.
