Æппæт медицинон гæххæттытæ, рентген хуызистытæ æмæ æндæр ахæм æрмæджытæн Цæгат Ирыстоны арæзт æрцæудзæн иумæйаг медицинон базæ. Информацион агентад ТАСС-æн уый фехъусын кодта республикæйы медицинон информацион-аналитикон центры хицау Майрæмыхъуаты Аслан. Фæнд кæнынц архив саразын, цæмæй йæм цыфæнды сахат дохтырты бон бацæуын уа рентген хуызистмæ æмæ медицинон анализты хатдзæгтæм æркæсынæн.
Специалисттæ куыд æмбарын кæнынц, афтæмæй ныридæгæн дæр республикæйы пайда кæнынц телемедицинæйæ. Зæгъæм, йæ фæрцы ис дохтырты консультацитæ райсæн, тагъд æххуысы къордтæ та электрон кардиограммæтæ бахъуаджы сахат арвитынц æмбæлгæ специалисттæм. Уыимæ телемедицинæйы руаджы æмгуыст кæнынц иннæ регионы æмæ муниципалитетты специалисттимæ. Хорз ма уый у, æмæ медицинон академийы студенттæн дæр ахуыры рæстæг амонынц телемедицинæйы сусæгдзинæдтæ. Хъыгагæн, ногдзинад апарахат кæнын æххæстæй не `нтысы. Уый та уымæн, æмæ æппæт домæнтæ закъоны фаг бæлвырд фыст не сты. Зæгъæм, дохтырæн бар нæй фæсаууонмæ диагноз æвæрын. Фыццаг хатт æм рынчын хъуамæ йæхæдæг æрбацæуа. Дарддæр низ дзæбæх кæнын æмæ рынчынмæ цæст дарæн ис видеобастдзинады фæрцы.
