Цӕгат Ирыстоны афӕдзы райдайӕнӕй СНИЛС скодтой 3 мин сывӕллонӕй фылдӕрӕн

Цӕгат Ирыстоны 3 мин сывӕллонӕй фылдӕр райстой СНИЛС афӕдзы райдайӕнӕй. Ныййарджыты уый тыххӕй бланктӕ дзаг кӕнын ӕмӕ рады лӕууын нӕ бахъуыд. Республикæйы Социалон фонды бамбарын кодтой: ныр алцыдӕр кусы йӕхигъӕдӕй. Граждайнаг уавӕры акттæ фыссыны управлени сывӕллоны райгуырд куы срегистраци кӕны, уæд электрон гӕххӕтт 3 боны дӕргъы æрбацӕуы Паддзахадон лæггæдты мады сӕрмагонд кабинетмӕ. Ацы нымæцон номыр сабийæн гом кӕны фыццаг ахсджиаг лӕггӕдтӕм фæндаг. Йæ ‘ххуысӕй ныййарджытӕн сӕ бон у социалон фиддонтæ райсын, поликлиникӕмӕ хи бафидар кӕнын ӕмӕ рæвдауæндонмæ сабийы бадæттын. Специалисттӕ сӕйрагдӕр цы курынц, уый паддзахадон лæггæдты гæнæнтæ сбӕрӕг кӕнын. Кӕд мад ӕрӕджы йӕ мыггаг аивта, уӕд сӕрмагонд информаци хъӕуы сног кӕнын. Науӕд Паддзахадон лӕггӕдтӕм сывӕллоны документ не ‘рбацæудзæн.