Фыццаг уал проект æрхъуыды кæнын, уый фæстæ йыл бакусын. Дарддæр æй къамисы размæ рахæссын æмæ йæ саразынæн æхцайы фæрæзтæ райсын. Ахæм гæнæнтæ ис президенты грантты конкурсы руаджы. Ацы аз сæ райстой Цæгат Ирыстоны 6 минæвары. Уæлахиздзаутæн сӕ фæндтæ сты фæзминаг. Иуты фæнды фæсивæды æрмдæсныйадыл ахуыр кæнын, иннæтæ сæ мобилон уæлæфтуаны æххуысæй мадæлон æвзагмæ æмхиц кæнынц. Грантисджытимæ фембæлдысты нæ уацхæсджытæ.
Ацы æрмадзы иу минут дæр æнкъард нӕ кӕнынц. Фæйнæджы лыггаг æрмдæсныйы къухты аивадон фæлдисонд фесты. Алы дзаумайы дæр — нæ рагзаман фыдæлты комулæфт. Уæлдай æргом ‘здахынц музыкалон инстументты кондадмæ. Аразынц сæ Нарты кадджытыл æнцайгæйæ. Зæгъæм,
дыууадæстæнон æмæ хъисын фæндыр.
Тауаситы Ким хъæдæрмæджы куыст кӕны 40 азы размæ. фæзынд æм хорз хъуыды — йæ фæлтæрддзинадæй кæстæртæн фæхай кæнын. Уый тыххæй байгом кодта æрмадз. Схуыдта йæ «Ремесло».
Ацы аз Тауаситы Кимы æрмадз рамбылдта президенты грантты конкурсы. Бакуыстой æрыгон фæлтæрæн æрмдæсныйад амоныны сæрмагонд проектыл. Йæ фæрцы, æххуысцух бинонты сывæллæттæ, стæй се ‘нæниздзинад хъыгдæрд кæмæн у, уыцы фæсивæд ахуыр кæнынц хъæдыл нывæфтыдтæ кæнын. Снысан кодтой 30 ахуырадон мадзалы Цæгат Ирыстоны алы районты.
Уæдæ мобилон уæлæфтуан «Базон-базон» дæр цымыдисаг у. Ис дзы 500 фарстайæ фылдæр. Се ‘хсæн мадæлон æвзаг, райгуырæн бæстæйы истори, географи, культурæ. Ныртæккæ дзы пайда кæныны фадат ис æрмæст андроидӕй пайдагæнджытæн. Æрæджы грант цы 400 мин сомы райстой, уый фæрцы программæйы гæнæнтæ фæуæрæхдæр уыдзысты.
Уæлахиздзауты ‘хсæн — спортивон организацитæ дæр. Национ спорты хуызтæ, хъæзтытæ æмæ культурæйы федераци бакуыста проект “Этноспорт”-ыл. Йæ сæйраг нысан — нæ фыдæлты уарзон спорты хуызтæй рохуаты чи баззад, уыдон сног кæнын.
Президенты конкурсмæ Цæгат Ирыстонæй сæ проекттæ балæвæрдтой 30 æнæкоммерцион организацийӕ. Уыдонæй 6 райстой гранттæ, æдæппæтæй 8 милуан сомы. Баст сты спорт культурæ æмæ туризмимæ.
Йæ къухы грант цы куыстуатæн нæ бафтыд, уымæн ис фадат йæ проекты аиппытæ сраст кæнын æмæ ногæй хи бафæлварын. Уыцы курдиæттæ исдзысты 1-æм февралæй, мæйы дæргъы.
