Кæсагдарыны куыст Цæгат Ирыстоны рæзы. Фæстаг азты нæхи базайраг кæсаджы бæрц 10 хатты фæфылдæр. Республикæйы ис алыхуызон æмвæзадыл 30 куыстуаты. Сæ иу «Форель Осетии». Тæрхæджытæм бахауыны разæй еугæфы гагтæ хъæуы бахъомыл кæнын. Уыцы куыст хуымæтæг нæу. «Форель Осетии» куыстуат æнтыстджынæй уæй кæны йæ продукци сыхаг регионтæм дæр. Сæ куысты тыххæй нæ дарддæры æрмæг.
Хæринаг ам дæттынц бæлвырд фæткмæ гæсгæ. Мичуринойы фермæйы ис инкубатор æмæ еугæфы гагатæ хъомыл кæнынæн бассейн. Хæдзарады ис валер кæсаджы 500 мин лæппыны. Дзæгъойты Фатимæ йæ хæдзарадмæ кæсы зæрдæргъвæдæй.
Мичуринойæ кæсаг бахауы канд республикæйы тæрхæджытæм нæ, фæлæ ма сыхаг регионтæм дæр. Куыстуаты базарадон нысан «Форель Осетии». Ам кæсагæй уæлдай аразынц валеры еугæф. Цæмæй кæсаг схъомыл кæнай, ууыл хъæуы бафыдæбон кæнын. Рæстæгæй дæр – дыууæ боны хъуыддаг нæу. Фермертæ пайда кæнынц нырыккон технологитæй, кæсынц фæсарæйнаг куыстуæтты фæлтæрддзинадмæ. Чи байрæзы уыцы кæсаджы уавæрмæ сæрмагонд цæстдард. Æппынæдзух сыгъдæг кæнынц хызæгтæ, бассейн, кæнынц дезинфекци. Фермæйы авналæнтæ уал фадат дæттынц кæсаджы 80 мин тоннæйыл кусын. Уый хыгъд фидæнмæ сæм ис стыр пълæнттæ.
Кæсагдарыны къабазы рæзтыл регионы дзурынц хицауады хæдзары дæр. Ныртæккæ Цæгат Ирыстоны ис алыхуызон авналæнтимæ 30 куыстуаты. Карп, валер, толстолобик æмæ лосось кæсаджы хуызтæ. Специалистты ныхæстæм гæсгæ Цæгат Ирыстоны ис æппæт фадæттæ дæр аквакультурæ кæй хонынц, уыцы куыст ног æмвæзадмæ ракæнынæн.
10 азы размæ Цæгат Ирыстоны-иу бакуыстой кæсаджы 360 тоннæйыл. Фæстаг азты уыцы бæрæггæнæн 10 хатты фæфылдæр сты. Ныр афæдзмæ куыстуæттæ уæй кæнынмæ схъомыл кæнынц кæсаджы 3 мин 600 тоннæйы. Хæстæгдæр азты уыцы нымæц дæр фæнд кæнынц 10 хатты фæфылдæр кæнын.
