Профессионалитеты фыццаг ахуырадон кластер “Барадхъахъхъæнæн куыст æмæ управлени” байгом Цæгат Ирыстоны паддзахадон базарадон-экономикон колледжы. Программæмæ гæсгæ студенттæ æмгуыст кæндзысты алыхуызон куыстуæттимæ, цæудзысты дзы практикæ. Уый руаджы фæсивæд арфдӕр зонгæ кæндзысты сæ равзæрст дæсныйадимæ, уыдзæн сын республикæйы куыстуæтты фæлварæны хуызы кусыны фадат.
Ахуыры фæстæ уайтагъд куыст ссарын алкæд къухы нæ бафты. Бæрæггæнæнтæм гæсгæ, не ‘мбæстæйæгтæн се ‘мбис цы дæсныйæдтæ райстой, уыдонмæ гæсгæ нæ кусынц. Рауагъдон равзары факультет, фæахуыр кæны. Каст æй фæвæййы, фæлæ бынтон æндæр фæндагыл ацæуы. Арæхдæр афтæ рауайы практикон ахуыртæ фаг кæй нæ вæййы, уый тыххæй. Студенттæ кæронмæ нæ бамбарынц, цы къабаз равзарынц, уый. Уымæ гæсгæ, сæ зæрдæмæ цæуы сæ дæсныйад æви нæ, уый дæр нæ банкъарынц. Цæгат Ирыстоны ацы фарста райхæлдтой федералон программæ “Профессионалитет”-ы руаджы.
Фыццаг профессионалитеты ахуырадон кластер “Барадхъахъхъæнынад æмæ управлени” нæ республикæйы байгом кодтой базарадон-экономикон колледжы. Программæмæ гæсгæ æмгуыст цæуы алыхуызон промышленнон куыстуæттимæ. Уый та ууыл дзурæг у, æмæ специалисттæ студенттимæ архайдзысты, уыдон сын сæ зонындзинæдтæ не вгъау кæндзысты. Афтæмæй, сæ фидæны архайдыл хуыздæр хъуыды кæндзысты.
Студентты исдзысты нæ республикæйы алыхуызон куыстуæттæм фæлварæны хуызы. Ахуырадон кластермæ чи хауы, уыцы куыстуæттæй иу “Деликат”. Ахæм æмгуыстад ратдзæн хорз бæрæггæнæнтæ, зæгъынц куыстдæтджытæ. Курдиатджын фæсивæды, гæнæн ис, æмæ бынаты райсой куыстмæ. Арæзт сын æрцæудзысты æппæт уавæртæ дæр.
Кластер гом кæныны кадджын мадзалы архайдта ахуырад æмæ наукæйы министры хæдивæг Габеты Вадим. Уый фæсивæдæн раарфæ кодта.
Ныртæккæ Уæрæсейы байгом кодтой 201 кластеры. Архайынц дзы 68 регионы. Ныр се ‘хсæн базарадон-экономикон колледж дæр. Мадзалы ма “Æгас цу” загътой ног студенттæн дæр. Фыццагкурсонтæн радтой сæ студентон билеттæ æмæ сын арфæ ракодтой.
